भांगरभूंय | प्रतिनिधी
2,800 कर्मचाऱ्यांच्या घरकान्नींनी घेतलो लाव; रक्कम करतले वसूल
भांगरभूंय I प्रतिनिधी
पणजी : सरकारी सेवेंत आशिल्ल्या ज्या कर्मचाऱ्यांच्याे घरकान्न सरकाराच्या गृहआधार येवजणेचो लाव घेतात, तांचे कडल्यान रक्कम वसूल करपाचे मोहिमेक महिला आनी बाल कल्याण खात्यान गती दिल्या. महिला आनी बाल कल्याण खात्यान खात्यांक अशा कर्मचाऱ्यांच्या नांवांची वळेरी आनी आतां मेरेन तांच्या घरकान्नींनी गृहआधार येवजणेचो लाव घेवन घेतिल्ले रक्कमेचो अहवाल दिला. गोंयांत अशे सुमार 2,800 सरकारी कर्मचारी आसात, अशी म्हायती खात्याची संचालक दीपाली नायक हिणें आमच्या प्रतिनिधी कडेन उलयतना दिली.
सरकार नोकरेंत आसून लेगीत ज्या कर्मचाऱ्यांच्याे घरकान्न गृहआधार येवजणेचो लाव घेतात, तांचे कडल्यान तांकां मेळिल्ली रक्कम वसूल करपाची मोहीम फाटल्या दोन वर्सां पसून सुरू आसून, खात्यान पयल्या वर्सा 22 लाख आनी दुसऱ्या वर्सा 14 लाख मेळून आतां मेरेन 36 लाख रुपया वसूल केल्यात, अशें दीपाली नायक हिणें सांगलें.
हे विशीं खात्याच्या प्रशासन विभागाचे उपसंचालक प्रकाश रेडकार हांणी दोन दिसा पयलीं विवीध खात्यांक जारी केल्ल्या पत्रांत ज्या सरकारी कर्मचाऱ्यांच्याे घरकान्न गृहआधार येवजणेचो लाव घेतात, तांचे कडल्यान तांणी घेतिल्ली रक्कम ऑगस्टाच्यान वसूल करतले. संबंदींत कर्मचाऱ्यांनी स्वताची अर्थीक परिस्थिती मतींत घेवन हप्तो निश्चीत करचो आनी तांच्या म्हयन्याच्या वेतनांतल्यान ही रक्कम वसूल करतले, अशें म्हणलां.
महिला आनी बाल कल्याण खात्याचे हे मोहिमेचो विवीध सरकारी कार्यालयांत काम करपी सुमार 2800 कर्मचाऱ्यांक फटको बसतलो. प्रकाश रेडकार हांणी एका खात्याक सादर केल्ल्या पत्रांत त्या खात्यांतल्या अशा कर्मचाऱ्यांक 33 हजार ते 1.16 लाखां मेरेनची रक्कम भरची पडटली.
राज्य सरकाराच्या ‘गृहआधार’ येवजणे खाला राज्यांतल्या पात्र बायलांक म्हयन्याक 2,500 रुपयांची अर्थीक मजत मेळटा.
गृहिणी, 15 वर्सां राबितो, वर्सुकीं तीन लाखां परस उणें उत्पन्न, विधवा, घटस्फोटींत बायलां हे येवजणे खातीर पात्र थारतात. सरकारी, निमसरकारी वा स्वयत्त संस्थांनी कार्यरत आशिल्ल्या कर्मचाऱ्यांच्याे घरकान्न फेब्रुवारी 2019 पसून हे येवजणेचो लाव घेवपाक मेळना.
येवजणेच्या नेमा आड वचून कांय सरकारी कर्मचाऱ्यांच्याे घरकान्न गृहआधार येवजणेचो लाव घेतात. ताका लागून महिला आनी बाल कल्याण खात्यान अशा कर्मचाऱ्यांक सोदून तांचे कडल्यान दिल्ली रक्कम वसूल करपाची मोहीम सुरू केल्या. आतां मेरेन हे येवजणेचो लाव घेतिल्ल्या कर्मचाऱ्यां कडल्यान 36 लाख रुपया जमा वसूल केल्यात.
येवजण ‘ऑनलायन’ केल्ल्यान प्रकरण उक्ताडार
सरकारी सेवेंत आसतना संबंदींत कुटुंबांतल्या व्यक्तीक नेमा प्रमाण कांय येवजणांचो लाव घेवपाक मेळना. वा एके येवजणेचो लाव घेतना दुसऱ्या येवजणेचो लाव घेवपाक मेळना. अशें आसून लेगीत कांय कर्मचारी अर्थीक सुवार्था खातीर फटीचीं म्हायती सादर करून सरकारी येवजण्यांचो लाव घेतात. सरकारी सेवेंत आसून लेगीत घरकान्न येवजणेचो लाव घेता. तांचेर नियंत्रण दवरपाक सरकारान ही यंत्रणा ऑनलायन केल्या. तेन्नाच्यान बेकायदो गृहआधार येवजणेचो लाव घेतिल्ले सरकाराच्या रडाराचेर आयल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
