भांगरभूंय | प्रतिनिधी
म्हापशें, प्रतिनिधी : सारमानशेर काल जाल्ल्या अपघातांत यतीन मयेंकार ह्या तरणाट्याक मरण आयिल्ल्याची खबर ताजी आसतनाच २४ वरां भितर आयज गिरी- म्हापश्यां रस्तो अपघातांत एकल्याक मरण आयलें. गिरी आयज दनपरां जुआँव डिसोजा (५८) हांचे गाडयेन रस्त्या कुशीक आशिल्ल्या माडाक नेटाचो धपको दिल्ल्यान जुआँव हांकां जाग्यारूच मरण आयलें.
हे विशीं चड म्हायती प्रमाण, जुआँव हे आयज दनपरां आपली जीए ०१ आर ८५६३ ह्या क्रमांकाची गाडी घेवन पर्वरीच्यान म्हापशेंचे दिकेन वताले. सांगोल्डा जंक्शन काडून कांय अंतराचेर पावतांच राष्ट्रीय म्हामार्गाचेर मदींच आशिल्ल्या एका माडाक तांणी धपको दिलो. हो धपको बरोच नेटान बशिल्ल्यान गाडयेच्या फुडल्या अर्द्या भागांत माड घुसलो आनी मोडून पडलो. अपघाता उपरांत जुआँव गाडयेंतूच आडकून उरले. म्हामार्गा वयल्यान वचपी वाहन चालकांनी गाडयो थांबोवन गाडयेचें दार मोडून जुआँवाक भायर काडलो. जखमी अवस्थेंत तांकां जिल्हो हॉस्पिटलांत दाखल केले. थंय तांकां मरण आयलां अशें दोतोरांनी सांगलें.
पर्वरी पुलिसांनी पंचनामो केलो. हो अपघात कसो जालो हाचो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
