भांगरभूंय | प्रतिनिधी
पोरणें गोंया मनयली गांधी जयंती
पणजी, प्रतिनिधी: समाजाच्या दरेक घटका मेरेन पावोवप हें महात्मा गांधीजी हांचें अंत्योदय तत्व आशिल्लें. पुण देश स्वतंत्र जावन लेगीत ह्या तत्वा खाला गरजेच्यो सुविधा सगळ्या लोकां मेरेन पावल्यो नात. 75 वर्सा उपरांत प्रधानमंत्री नरेंद्र मोदी हांणी अंत्योदय तत्वाचेर दरेक मनशा मेरेन सगळ्यो सुविधा पावयलो, अशें वक्तव्य मुख्यमंत्री डॉ. प्रमोद सांवत हांणी करून देश आनी राज्य 2047 मेरेन विकसित जावचे हें गांधीचें सपन साकार करपा खातीर लोकांनी आपलें योगदान दिवचें असो उलो मारलो.
2 ऑक्टोबराक पोरणें गोंया गांधी सर्कलाचेर शासकी गांधी जयंती मनयली. महात्मा गांधी हांच्या पुतळ्याक आर्गा ओंपलीं. उपरांत मुख्यमंत्री उलयताले.
महात्मा गांधी हांणी सत्य आनी अहिंसे खातीर जिवीत ओंपलें. नितळसाण हो धर्म म्हूण देशभर प्रचार करत सत्य अहिंसा बरोबर आत्मनिर्भरता हे गजालीचेरुय भर दिलो, अशें मुख्यमंत्र्यान सांगले.
प्रधानमंत्री नरेंद मोदी हांणी नितळसाण ही मोहीम फुडें व्हरता आसतना, क्लिन इंडीया मिशन 2 ऑक्टोबराक सुरवात केली आनी ह्या अभियानाक 10 वर्सां पुराय जाल्यात. गांधीजी हे पयले राष्ट्रपिता आसतले, जांणी स्वतः सान्न हातात घेवन, रस्त्यार देवून देश नितळ करपाक सुरवात केली आनी नितळसाण, स्वतंत्रताय ह्यो दोनूय मोहीम हातात घेतल्यो, अशे मुख्यमंत्र्यान म्हणलें.
राष्ट्र निर्मणेच्या कार्यांत बापुजीन तेन्ना अंत्योदय तत्वांक पाळो दित समाजाच्या शेवटाच्या घटका मेरेन पावोवपाचो यत्न केलो. फकत स्वातंत्र्य मेळ्ळें म्हूण जावचें ना पूण स्वातंत्र्याचीं फळां हीं सगळे धर्म आनी जाती मेरेन पावोवप ही तांची मोख आशिल्ली. उपरांत कितलींशींच वर्सां जालीं खऱ्या अर्थान स्वातंत्र्याचीं फळां सगळ्या मेरेन पावलींच नात. दरेकांक घर, रस्ते, नळ, उदक, विमो हांची गरज आशिल्ली ती लोकां मेरेन पावोवपा खातीर 75 वर्सां लागलीं. पूण आतां खोस भोगता की आतांचे प्रधानमंत्री नरेंद्र मोदी हांणी दरेका मेरेन ही गजाल पावोवपा खातीर आत्मनिर्भर भारत ही संकल्पना चालीक लायली. ह्यो सगळ्यो सुविधा लोकां मेरेन पावोवपा खातीर आनी दिव्यांगाक तांचो हक्क दिवपा खातीर ते सातत्यान वावुरतात, अशें मुख्यमंत्र्यान सांगले.
गांधीजी हांणी विदेशी कपड्यांचो त्याग करत चरख्याचेर खादी कपड्यांक महत्व दित खादी पुनर्जिवीत करपाचो काम व्हड प्रमाणात सुरू केले. व्होकल फोर लोकल मिशन खाला आमी थळावे गजाली वापरपाक सुरु करपाक. हे दिसा निमितान लोकांनी खादी वस्त घेवन दुसऱ्यांक प्रेरणा दिवची. गांधीजी आनी शास्त्रीजी हांणी तेन्ना पळयल्लें सपन जशें की मेक इन इंडीया, डिजीटल इंडीया, स्टार्टअप इंडीया, क्लिन इंडीया आनी फिट इंडीया हे सगळ्यांचेर भर प्रधानमंत्री मोदी हांणी नितळसाणे बरोबर दिला. भ्रष्टाचार नश्ट करून सरकारी येवजण्यो लोका मेरेन पावोवप ही मोख आमी दवरल्या, अशे मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
