भांगरभूंय | प्रतिनिधी
वीज अभियंत्यांनी प्रस्ताव धाडूंक नाशिल्ल्याचें जालें उक्तें
सभापतीन ‘काणकोण व्हिजन 2030’ खातीर पणजेंत आपयिल्ली बसका
काणकोण: काणकोणां विवीध वाठारांनी विजेचे खांबे मोडपाक पावल्यात. ते बदलपा खातीर पंच, सरपंच आनी पालिका वाठारांतले नगरसेवक हांची मागणी आशिल्ली. पूण ही मागणी आसून लेगीत काणकोणच्या वीज अभियंत्यांनी गरजेच्या सामानाची मागणी केन्ना करूंकच ना अशी म्हायती वीज मंत्री सुदिन ढवळीकार हांणी सभापती रमेश तवडकार हांणी पणजेंत आपयिल्ले मंत्री आनी संबंदीत अधिकाऱ्यांचे बसके वेळार दिली.
वीज खात्या कडेन सद्या पांच हजार विजेचे खांबे तयार आसात. काणकोणां तातूंतले खांबे दितले. भुंयगत वीज वाहिन्यो घालपा खातीर तशेंच विजे संबंदीत ज्यो समस्या आसात त्यो सोडोवपा खातीर काणकोणां 200 कोटी रुपया खर्च करूं अशी गवाय ढवळीकार हांणी दिली.
काणकोण नगरपालिका वाठाराचे सोबितीकरण, पाळोळ्यां मल्टी लिफ्ट पार्कींग हे खातीर लक्ष घालतले अशें नगर विकास मंत्री विश्वजीत राणे हांणी सांगलें. जाल्यार भलायकी मंत्री ह्या नात्यान काणकोणच्या सरकारी समाजीक हॉस्पिटलाचो दर्जो वाडयतले अशी गवाय विश्वजीत राणे हांणी दिली. तेच बरोबर भलायकी खात्याक 30 अॅम्ब्युलन्सी येवपाच्यो आसात. तातूंतली एक अॅम्ब्युलन्स सगल्यांत पयलीं काणकोणां दितले अशें राणे हांणी सांगलें.
ह्या वेळार वीज खात्याचे वरिश्ठ अभियंते स्टेफन फर्नांडीस, सहाय्यक वीज अभियंतो अनूप राणे, भलायकी संचालिका डॉ. गीता काकोडकगर, काणकोणच्यो भलायकी अधिकारी डॉ. स्नेहा आमोणकार, डॉ. दिवाकर वेळीप, एल्डा फर्नांडीस, उपजिल्होधिकारी रमेश गांवकार, नगराध्यक्ष सायमन रेबेलो, उपनगराध्यक्ष लक्ष्मण पागी, नगरसेवक रमाकांत नायक गांवकार, नार्सिस्को फर्नांडीस, शांबा देसाय, भाजपा मंडळ अध्यक्ष विशाल देसाय, सिद्धार्थ देसाय, नागेश कोमरपंत, दिवाकर पागी, गंधेश मडगांवकार, संजू तिळवे, हेमंत नायक गांवकर, संतोष लोलयेंकार, आनंदराव देसाय, राजेंद्र बोरकार, उपासो गांवकार आनी हेर मानेस्त हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
