भांगरभूंय | प्रतिनिधी
डाॅ. दिव्या राणे ः ठाणे गणेशोत्सव मंडळाचे वतीन गुणी विद्यार्थ्यांचो भोवमान
वाळपय ः सार्वजनिक गणेशोत्सव मंडळाच्या माध्यमांतल्यान लोकांक एकठांय येवपाची बरी संद मेळटा. ताका लागून समाजांतल्या दरेका घटकाक माचयेची संद फावो जाता. मंडळाचे वतीन घेतात त्या दरेका उपक्रमांत लोकांनी आनी विद्यार्थ्यांनी वांटेकार जावचें अशें आवाहन गोंय रान उदरगत महामंडळाची चॅरमन आनी पर्यें मतदारसंघाची आमदार डाॅ. दिव्या विश्वजीत राणे हांणी केलें.
ठाणे सार्वजनिक गणेशोत्सव मंडळान आयोजीत केल्ल्या इनामां वांटप आनी भोवमान सुवाळ्यांत मुखेल सोयरीं ह्या नात्यान तीं उलयताली. मंडळाच्या सभाघरांत ही कार्यावळ जाली. ह्या वेळार माचयेर केरी जिल्हा पंचायत वांगडी देवयानी गांवस, दक्षीण गोंयचे उपजिल्हाधिकारी प्रदीप नायक, ठाणे पंचायतीची सरपंच सरिता गांवकार, मंडळाचे अध्यक्ष पांडुरंग गांवकार आनी मंडळाचे सचीव बाळकृष्ण नायक हांची उपस्थिती आसली.
आपल्या वाठाराक विकासाची संद लाबपाची आसत जाल्यार दरेकान आपापले परीन योगदान दिवप खूब गरजेचें. सगल्योच गजाली सरकाराच्या माध्यमांतल्यान घडनात. हे खातीर नागरिकांचें सहकार्य अपेक्षीत आसता. ठाणे वाठारांत आयज मेरेन विकासाच्यो अनेक संदी उपलब्ध जाल्यात. येता त्या काळांतूय ह्या वाठारांत आशिल्ल्यो समस्या सरकाराच्या माध्यमांतल्यान सोडोवपाचो यत्न करतलीं अशें डाॅ. दिव्या राणे हांणी सांगलें.
विद्यार्थ्यांनी शिक्षणीक मळार नांव जोडचें हे खातीर तांकां उर्बा दिवपा खातीर गणेशोत्सव मंडळान योगदान दिलां. हें मंडळ वेगळेवेगळे उपक्रम चालीक लावन तातूंत लोकांक आनी विद्यार्थ्यांकूय आसपावन घेता अशें प्रास्तावीक करतना मंडळाचे सचीव बाळकृष्ण नायक हांणी सांगलें.
मंडळाचे अध्यक्ष पांडुरंग गांवकार हांणी येवकार दिलो आनी उपक्रमांचो नियाळ घेतलो. केरी जिल्हो पंचायत वांगडी देवयानी गांवस हांणी मंडळाच्या कार्याक सगल्यांनी सहकार्य करचें अशें आवाहन केलें.
ह्या वेळार मुखेल सोयरी आनी माचये वयल्या मानेस्तांचे हस्तुकीं गुणी विद्यार्थ्यांचो भोवमान केलो. हातूंत प्रांजल प्रकाश पाटील (पांचवी), श्रवणी दत्ता पर्येकार (सवी), प्रबोधन प्रदीप देसाय (सातवी), नंदिनी यशवंत पालकार (आठवी), सावली सखाराम गांवस (णववी) हांचो आसपाव आसा. तशेंच धावी परिक्षेंत बरी कामगिरी केल्ल्या साईनाथ अंकुश गांवस आनी श्रुती बाबला सावरशेकार आनी इकरावेंतल्या अनुजा अनिल देसाय आनी बारावी परिक्षेंतल्या संजीवकुमार बाळकृष्ण नायक हांचोय भोवमान केलो.
पुराय कार्यावळीचें सुत्रसंचालन प्रशांत नायक आनी सरोजिनी गांवस हांणी केलें. मंडळाच्या सभाघर बांदकामा खातीर अर्थीक सहकार्य करतल्या दात्यांचो ह्या वेळार मानेस्तांचे हस्तुकीं भोवमान केलो.
बाळकृष्ण नायक हांणी उपकार मानले. हे कार्यावळीक भावीक व्हडा प्रमाणांत हाजीर आसले. माचये वयल्या मानेस्तांक फुलांतुरे दिवन येवकार दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
