भांगरभूंय | प्रतिनिधी
इंडीयन प्रिमीयर लिगेची (आयपीएल) फायनल कोलकाता नायट रायडर्स आनी सनरायझर्स हैदराबाद ह्या पंगडां मदीं हांगाच्या चेपॉक मैदानाचेर जातली.
कोलकाता नायट रायडर्सान क्वॉलिफायर एक मॅचींत सनरायझर्स हैदराबादाक हारोवन फायनलींत थेट सुवात मेळयिल्ली, जाल्यार हैदराबादान क्वॉलिफायर दोनांत राजस्थान रॉयस्सा आड जैत जोडून फायनलींतली सुवात निश्चीत केल्ली.
कोलकाता नायट रायडर्सा कडेन तिसरे खेपे जाल्यार हैदराबादा कडेन दुसरे खेपे किताब जिखपाची संद आसा.
आयपीएलाच्या इतिहासांत दोनूय पंगड एकामेका आड अजून मेरेन 27 मॅची खेळ्ळ्यात. हातूंतल्यो 18 मॅची कोलकातान जाल्यार हैदराबादान फकत णव मॅची जिखल्यात. कोलकातान फाटल्या आठांतल्यो स मॅची जिखल्यात, फकत दोन मॅचींनी हार घेतल्या.
अंदूंच्या हंगामांत हे पंगड एकामेका आड दोन खेपे खेळ्ळ्यात. मुळाव्या पांवड्यार कोलकातान चार धांवड्यांनी जैत जोडिल्लें, जाल्यार क्वॉलिफायर एकांत ताणें हैदराबादाक 8 विकेटींनी हारयिल्लो. दोनूय पंगडांचेर नदर मारली जाल्यार कोलकाताचो आत्मविस्वास वाडिल्लो आसा. फास्ट बॉलर मिचेल स्टार्क फॉर्मांत आयला. ही कोलकाता खातीर खोशेची गजाल आसा. बॅट्समनांनी अंदूंच्या हंगामांत सातत्यान बरें प्रदर्शन केलां.
कोलकातान अजून मेरेन चार खेपे फायनलींत सुवात मेळयल्या. दोन खेपे वस्तादपण जोडलां, जाल्यार दोन खेपे हार हारला. 2012 आनी 2014त गौतम गंभीराच्या फुडारपणाखाला कोलकातान आयपीएल जिखिल्ली.
दुसरे वटेन हैदराबादान अजून मेरेन फकत एकदाच किताब जिखला. ताणें हो किताब 2016त डॅव्हिड वॉर्नराच्या फुडरापणाखाला जिखिल्लो. 2018त ताणें फायनलींत सुवात मेळयिल्ली. पूण, ताका त्या वेळार उप वस्तादपणाचेर समाधान मानचें पडिल्लें. हैदराबादा परस कोलकाताक चड फायनलींत खेळपाचो अणभव आसा. तशेंच पंगडा कडेन गौतम गंभीरा सारको मॅण्टर आसा.
कोलकाताची बॅटींग आनी बॉलींग समतोल आसा. बॅटींग विभागांत सुनील नरेन, वेंकटेश अय्यर, श्रेयस अय्यर, रिंकू सिंह, आंद्रे रसेल आनी रमणदीप सिंह जबरदस्त फॉर्मांत आसा. बॉलींग विभागांत मिचेल स्टार्क, वैभव अरोरा, हर्षित राणा हांणी सेगीत बरी बॉलींग केल्या. हे बॉलर प्रतिस्पर्धी पंगडांच्या बॅट्समनांक व्हड शॉर्ट खेळपाक मातूय दिनात. स्पिन विभाग लेगीत बरोच घटमूट आसा. वरुण चक्रवर्ती 16 विकेटी घेवन पर्पल कॅपाचे रेसींत आसा. वरुण भागिदाऱ्यो फोडपाक प्रसिद्ध आसा. सुनील नरेनान ताका बरी साथ दिल्या.
हैदराबाद आपले आक्रमक खेळा खातीर प्रसिद्ध आसा. फाटल्यो कांय मॅचींचेर नदर मारली जाल्यार हें स्पश्ट जाता. पॅट कमिन्साच्या फुडारपणाखाला खेळपी हैदराबादाचो दरेक खेळगडो आक्रमण करता. कमिन्स आपल्या वांगडा ऑस्ट्रेलिया पंगडांत आशिल्ली आक्रमकताय घेवन आयला. हे रणनिती वरवीं प्रतिस्पर्धी पंगडाचो आत्मविस्वास उणो जाता. राहुल त्रिपाठी कसलीच भिरांत बाळगिनासतना बॅटींग करता. ओपनर ट्रॅव्हिस हेड आनी अभिषेक शर्मा हांणी जर खेळपट्टीचेर जम बसयलो जाल्यार तांकां आडावप खूब कठीण. मदले फळयेंत हॅन्रिक क्लासेन आनी नितीश रेड्डी मदले फळयेंत जलद रितीन धांवड्यो करून प्रतिस्पर्धी पंगडांचेर चेपण वाडयता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.