कोलकाताची बॅटींग परतून गडगडली

भांगरभूंय | प्रतिनिधी

इंडियन प्रिमियर लिगेंत (आयपीएल) काल जाल्ले 39वे मॅचींत गुजरात टायटन्सान कोलकाता नायट रायडर्साक ताच्याच घरच्या मैदानाचेर 39 धांवड्यांनी हारायलो. इडन गार्डन्साचेर जाल्ले मॅचींत फाटले मॅची भशेन हे मॅचींत लेगीत कोलकाताच्या बॅट्समनांनी निर्शेणी हाडली. फाटले मॅचींत पंजाबा आड 112 धांवड्यांचो फाटलाव लेगीत ताका करपाक जमूंक नाशिल्लो. हे मॅचींत लेगीत तांकां खाशेलें प्रदर्शन करपाक जमूंक ना.

गुजरात टायटन्सान 3 बाद 198 धांवड्यो करून कोलकाताक जैता खातीर 199 धांवड्यांची मोख दिल्ली. पूण, ताका निर्धारीत 20 ओव्हरींनी 8 विकेटी व्हगडावन 159 धांवड्यो करप शक्य जाल्यो. कोलकाताची ही पांचवी हार थारली.

ते आदीं टॉस हारल्या उपरांत पयलीं बॅटींग करपी गुजरात टायटन्सान उत्कृश्ट सुरवात केली. साई सुदर्शन आनी शुभमन गिल हांणी ताबडतोड शॉर्ट मारले. तांणी सुरवाती सावन सादारण 10चे धांवगती उरतली हाची काळजी घेतिल्ली. तांकां बाद करपाचो कोलकाताच्या बॉलरांनी खर यत्न केलो. पूण, तांकां आडावपाक बॉलरांक शक्य जालें ना. साई आनी गिल हांणी शेंकड्याची भागिदारी केली.

दोगांयनी एकसारकेच स्ट्रायक रेटीन आपले अर्द शेंकडे पूर्ण केले. गिलान 34 बॉलांनी अर्द शेंकडो पूर्ण केलो, जाल्यार सुदर्शनान अर्द शेंकडो पूर्ण करपाक 33 बॉल घेतले. सुदर्शनाचो अंदूंच्या हंगामांतलो हो पांचवो अर्द शेंकडो थारलो. तशेंच ताणें अंदूंच्या हंगामांत 400 धांवड्यंचो टप्पो लेगीत हुपलो. तशेंच गिलान अंदूंच्या हंगामांतलो तिसरो अर्द शेंकडो नोंदयलो. तशेंच अंदूंच्या हंगामांते भागिदारींत गिल आनी सुदर्शन हांणी 400चो टप्पो हुपलो. साई सुदर्शनान 36 बॉलांनी स चवके आनी एका सक्याचे मजतीन 52 धांवड्यो केल्यो. 13वे ओव्हरींत रसेलाचे बॉलिंगेचेर गुरबाजाक कॅच दिवन तो तंबूंत परतलो. ते उपरांत शुभमन गिलाक लेगीत शेंकडो चुकलो. तो 55 बॉलांनी 10 चवके आनी तीन सक्यांचे मजतीन 90 धांवड्यांचेर बाद जालो. राहुल तेवतियाक (0) खातें लेगीत उगडपाक जमलें ना. जोस बटलरान 23 बॉलांनी 43 धांवड्यो करून गुजराताचो स्कोर 198 मेरेन पावयलो. शाहरुख खानान 5 बॉलांनी 11 धांवड्यो केल्यो.

कोलकाता वतीन वैभव अरोरा, हर्षित राणा आनी आंद्रे रसेल हांकां एकेक विकेट फावो जाली.