भांगरभूंय | प्रतिनिधी
वेस्टर्न बायपास हांगाच्या कोयराची केली पळोवणी
मडगांव, प्रतिनिधी : बाणावले पंचायत वाठारांत वेस्टर्न बायपास लागसारा कोयर उडोवपाच्या प्रकरणांत पंचायतीन पुलीशेंत कागाळ केल्या. बिरेस्तारा प्रदुशण मंडळान पळोवणी केल्या उपरांत वरिश्ठांक अहवाल सादर करून मडगांव पालिकेक नोटीस धाटले अशें सांगलें.
गोंय राज्य प्रदूशण नियंत्रण मंडळाच्या अभियंत्यां कडल्यान बिरेस्तारा वेस्टर्न बायपासाचेर कोयराचे राशीची पळोवणी केली. बाणावले पंचायत आनी आमदार व्हेंझी हांणी ह्या कोयर उडोवपाच्या प्रकरणांत हुस्को उक्तायला. प्रदूषण नियंत्रण मंडळाच्या पळोवणी वेळार ह्या कोयरांत बागेंतलो कोयर आनी हेर कोयर मिस्तुराद आशिल्ल्याचें दिसलें.
प्रदूषण नियंत्रण मंडळाचे कनिश्ठ अभियंते सिद्धांत प्रभुदेसाय हांणी सांगलें : वेस्टर्न बायपासा कडले उक्ते सुवातेर मडगांव पालिकेन उडयल्ले कोयराचे राशींत बागेंतलो कोयर आनी हेर कोयर मिस्तुराद आसा. ह्या कोयरांत नाल्लाच्यो कट्ट्यो आनी सोण्णांचो आसपाव आसा. हे विशीं मडगाव नगरपालिकेक नोटीस धाडून तांकां वेस्टर्न बायपासाचेर कोयर उडोवचो न्हय अश्यो सुचवण्यो दितले. मडगांव नगर पालिकेन सोनसड्याच्या प्रकल्पांत बागेंतल्या कोयराचेर प्रक्रिया करपा खातीर उपाय करचे.
भौशीक सुवातेर कोयराचो चुकीचे सुवातेर विलो लायिल्ले खातीर थळाव्यांनी हुस्को उक्तायलो. ह्या कोयराची पळोवणी प्रदूशण नियंत्रण मंडळा वरवीं जावची हे मागणे उपरांत ही पळोवणी केली. जापसालदार कोयर वेवस्थापन पद्धतींचे गरजेचेर भर दिल्या. नगर पालिकेन नेम पाळप गरजेचें. सैम राखपा खातीर कोयराचेर योग्य प्रक्रिया करचे खातीर पालिकेक नोटीस धाडटले अशेंय प्रदूशण नियंत्रण मंडळान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
