भांगरभूंय | प्रतिनिधी
गोंयांत सगल्याक कोयराच्यो राशी पळोवंक मेळटात. कोयरा पसून कोणाची सुटका ना. कोयराचो जल्म खंयच्यान जाता हें सगल्यांक खबर आसाच. आमच्या घरांतल्यान. सगल्या घरांनी कसलो ना कसलो कोयर जाताच. प्लास्टिकाचो, दुदाच्यो पोतयो, भाजीपालो, फळां गुठलावन हाडटात, त्यो पोतयो, ओलो कोयर, चिप्साचीं पाकिटां, रांदचे कुडींतलो कांदे, बटाटे, भाजी, उश्टें हांचो कोयर, पोरसांतल्या झाडांच्यो खांदयो, पानां… सगलो मेळून कोयरूच कोयर. चड करून बाजारांतल्यो वस्तू गुठलायतात, त्या प्लास्टिकाचो कोयर चड जाता.
कोयराचो विलो लावपाचें काम सगल्यांत पयलीं घरांतल्यान जालें जाल्यार चड बरें. सगल्यांक पालिकांनी दिल्ल्यो सुक्या आनी ओल्या कोयराच्यो बालद्यो आसात. ताचो वापर लोकांनी करपाक जाय. पालिकेचे कामगार दारांत येतात, तांकां नेमान कोयर दिवपाक जाय. पोरसांतलो कोयर उजो लावन लासूंक जाय. बाजारांत वतना कापडाची पोती व्हरपाक जाय.
कोयर मेळटा त्या जाग्यार उडोवप बरें न्हय, ताका लागून आमचो वाठार घाणयारो जाता. खूब दीस कोयर एकाच जाग्यार उरलो काय मागीर तो कुसता आनी लोकांक नाका पुरो जाता. जळारां, मुस तयार जातात. हेच मुस आशीकुशीक वडा- पाव, रस्सा आॅम्लेट, पानी पुरी गाड्यां वयल्या साबार जिनसांचेर बसतात. मागीर ते खावप्यांक मोडशी जावपाक शकता. जळारांक लागून मलेरिया, डेंगू जावं येता. दुसरें म्हणल्यार रस्ताद गोरवां, सुणीं हो कोयर सगल्याक पातळून उडयतात. प्लास्टिक जनावरां खातात आनी मागीर दुयेंत पडटात. कांय मरतातूय बी. कोयर उडयिल्लो आसता, थंयच्यान वचपी लोकांक नाक बंद करून चलचें पडटा. भायले पर्यटक येतात, ते कोयर पळोवन बेजारतात. देखून आमच्या पर्यटनाचेरुय कोयराचो परिणाम जावपाक शकता.
दरेकल्यान कोयर खंयूच उडोवचो ना अशें थारायल्यार ‘स्वच्छ भारत, नितळ गोंय’ जावपाक वेळ लागचो ना. मात, आमकां समाजीक जाणीव ना, दुसऱ्यांचें पडिल्लें ना. आपलें सादलें काय जालें.
सिद्धी तिळवे
9158200956
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
