भांगरभूंय | प्रतिनिधी
अरूण कमलः कोंकणी भाशा मंडळाचो पुरस्कार सुवाळो
मडगांव: मायभास कोंकणी खातीर कोंकणी मनशांक व्हड संघर्श करचो पडलो. असोच संघर्श बंगाली भाशे खातीरूय करचो पडला. बंगालीक लागून थंय भाशा दीस मनयतात. मात, कोंकणी भाशे बाबतींत अशें घडना, अशें साहित्यीक अरुण कमल हांणी सांगलें. कोंकणी भाशा मंडळाच्या 60 व्या हिरक महोत्सवी वर्सा निमतान वर्सुकीं पुरस्कार भेटवण सुवाळ्यांत ते मुखेल सोयरे म्हूण उलयताले. मडगांवां गोमंत विद्या निकेतन सभाघरांत ही कार्यावळ जाली.
मानाची सोयरी म्हूण ज्येश्ठ साहित्यीक मीना काकोडकार, कोंकणी म्हालगडे नारायण मावजो, गोंय शालांत मंडळाचे आदले अध्यक्ष जुझे रिबेलो, ज्येश्ठ कोंकणी कार्यकर्ते आर. बी. एस. कोमरपंत, जिपार्ड सोसायटीचे सचीव मायकल डिसोझा हे मानेस्त हाजीर आशिल्ले. तशेंच मंडळाची अध्यक्ष अन्वेषा सिंगबाळ, उपाध्यक्ष पोब्र फर्नांडीस, सचीव उल्हास गांवकार आनी भांडारी राजेश प्रभू हाजीर आशिल्ले.
भारताचो इतिहास पळयल्यार सगल्याच भाशांक संघर्श करचो पडला. खंयचेच भाशेक सोंपेपणान मान्यताय मेळूंक ना. ब्रिटिशांनी भारतांत ज्या राज्यांनी राजवट चलयली थंयची भास आनी संस्कृताय नश्ट करपाचो यत्न केलो. कांय राज्यांक भास तिगोवन दवरपा खातीर व्हड संघर्श करचो पडलो, जाल्यार कांय भाशा नश्ट जाल्यो. भारतांत कोंकणी भाशेची सुवात सगल्यांत वयर आसा, अशें अरुण कमल हांणी सांगलें.
भाशा आनी संस्कृतीचे रक्षण करपी सगले लेखक, साहित्यीक, कवी हांकां तांणी परबीं भेटयलीं. उल्लेखनीय वावरा खातीर पुरस्कार मेळप ही व्हड खोशयेची गजाल. गोंयचीं कातारां, गितां, संगीत आयकून आपणाक व्हड खोस जाली. कोंकणी पुरस्कार भेटवण सुवाळ्याक आमंत्रीत करून मानेस्तांक पुरस्कार भेटोवपाची संद दिल्ले खातीर आपूण स्वताक भाग्यवान समजता, अशेंय तांणी सांगलें.
भाशा मंडळान कोंकणी भाशेंतल्यान साहित्य निर्मणी आनी शाळा सुरू केल्यात ही व्हड अभिमानाची गजाल. मुळावें शिक्षण मायभाशेंतल्यान मेळपाक जाय. कोंकणी भाशा मंडळ ही बिगर सरकारी संस्था. ती चलोवप हें खूब कठीण काम. भास आनी संस्कृताय तिगोवन दवरपाक राज्य सरकाराचो तेंको आनी सहकार्य गरजेचें, अशेंय अरुण कमल हांणी सांगलें.
लेखक धर्मानंद कोसंबी हांच्या गौतम बुद्ध ह्या पुस्तकाचेर उलयतना तांणी सांगलें, डी. डी. कोसंबी हांची व्हड इतिहासकार म्हूण देशभर नामनां आसा. भाशा मंडळान कोंकणी लोकगितां आनी लोककथांचो संग्रह करून दवरचो अशें तांणी सांगलें.
भाशा मंडळाची अध्यक्ष अन्वेषा सिंगबाळ हांणी येवकार दिलो, जाल्यार उल्हास गांवकार हांणी उपकार मानले.
ते उपरांत रवींद्र केळेकार ज्ञान मंदिराच्या विद्यार्थ्यांनी सांस्कृतीक कार्यावळ सादर केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
