भांगरभूंय | प्रतिनिधी
कलाकार
गोंय ही कला आनी कलाकारांची परजळपी भांगराळी भूंय, गोंयच्या दरेका गांवांत आमकां एक तरी गुणेस्त कलाकार पळोवंक मेळटा. तातूंतलोच एक मंडूर- डोंगरे वयलो गायक, संगीतकार शिवसागर कमलाकांत नायक. ल्हानपणाच्यान पं. जितेंद्र अभिषेकी हांचें संगीत आयकत ताच्या प्रवासाची सुरवात जाली. आयज गोंयभर गायक म्हणून ताणें नामना जोडल्या. गायनाचे पयलें पावलं ताणें शाळेंतल्या देशभक्ती गायन सर्तींत वांटेकार जावन उबारलें. उपरांत णववी आनी धावेक अभ्यासाच्या भारा खातीर थांबले, पूण ताणें गायना पूर्णविराम लागूंक दिवंक ना. बारावी विज्ञानाचे शिक्षण घेताना गायन सर्तींत वाटेंकार जावन ताणें दुसरें इनाम मेळयलें. पुराय बारां वर्गां मदीं इनाम मेळटलें आनी आपूण गायन करूं शकतां अशें ताका दिसूंक नासलें. उपरांत खांडोळ्यां महाविद्यालयांत सूक्ष्मजीवशास्त्रांत पदवी मेळयतना फनवीकाक जावपी संगीत कार्यावळींत वांटेकार जावन ताणें इनामां जोडलीं.
शिक्षक आनी इश्टांच्या मार्गदर्शना खालां शिवसागर हाणें 2017 वर्सां शास्त्रीय गायन शिकपाक सुरवात केली. फकत गायनूच केलें म्हणून जायना वांगडा एखादें वाद्य शिकल्यार खूब फायदो जातलो, अशें दिशिल्ल्यान तांणे गिटाराचें शिक्षण घेतलें. ते घेवन तो गीत म्हणपाक शिकलो. गीत मोबायलांत रिकाॅर्ड करून आपल्या युट्यूब चॅनलाचेर अपलोड करपाक ताणें सुरवात केली. फकत मोबायलाचेर रिकाॅर्ड करून उपकारना, हे खातीर तें कशें रिकाॅर्ड करप तें तो शिकलो. मायक आनी साधारण स्टुडिओ जाय पडटा, हें ताका कळ्ळें. शिकतना हें सगलें घेवप शक्य नासले, पूण बचत केल्ल्या पयश्यांनी ताणें आपलो पयलो कंडेनसर मायक घेतलो आनी कारायोके ट्रॅक्टाच्या आदारान पदां युट्यूबार घालपाक लागलो. पूण कॉपीरायटा खातीर अडचणी येताल्यो. तातूंतल्यान वाट काडपाक ताणें स्वता संगीत निर्माण करपाचें चिंतलें.
युट्यूबाचेर मोबायलाच्या माध्यमांतल्यान कशें गीत रिकाॅर्ड करतात, हें शिकून घेतलें आनी ताणें पयलेंच खेपे ‘भावा तुका याद आसा अठरा जून’ ह्या गीताक संगीत दिलें. उपरांत 2018 वर्सां ताचें पयलें गीत ‘नरकासूर एन्थम’ आयलें. ताणें हें पुराय गीत फकत मोबायलाचेर निर्माण केल्लें. उपरांत ताची ‘शिगमोत्सव 2019’ आनी ‘शिगमोत्सव 2020’ ह्या गीतांनी भरपूर नामना जोडली. ताणें ‘कित्या खातीर’, ‘कित्या तूं’, ‘पावसाच्या दिसांनी’, ‘लइराई माय गे’, ‘यादी’ ह्या गाजपी कोंकणी गीतांक म्होवाळ आवाज दिला. सद्या ताचें ‘Folk Unplugged’ हें गीत खूब ट्रेंडिंग जाता.
रोहीत गवंडी ह्या नामनेच्या गायकाच्या मार्गदर्शना खालां ताणें कोंकणी संगीत विश्वांत पावल दवरलां. मयुरेश साळगांवकार ह्या संगीत निर्मात्या वांगडा ताणें अक्षय नायकाचे ‘यो मोगा’ ह्या गिताचें रिमेक केलां.
‘युवा महोत्सव’, ‘उर्बा’ आनी हेर सर्तींनी वांटेकार जावन शिवसागरान इनामां जोडल्यात. खूबश्या घरांनी संगीताच्या मळार फावो तो आदार मेळना, पूण ताका ताच्या घरच्यांनी खूब मजत केल्या. आपल्या स्वताच्या Shivatva स्टुडिओच्या कामा खातीर खासा ताका पयश्याच्या बाबतीन ताचो भाव शिवदीप नायक हांणी खूब मजत केल्या. कोंकणी भास आनी संगीताक दर्जेदार पावण्यार पावोवपाचें ताचें सपन आसा. ते खातीर तो मेहनत करता. जर कोणाक संगीताची आवड आसा जाल्यार ताणें शाळेंत आसतानाच तयारी करपाक जाय. सगल्यां लागीं एकूच मागणे तें म्हणजे कोंकणी संगीताक आनी कोंकणी खातीर वावुरपी गोंयच्या दरेका कलाकारांक तेंको आनी मोग दियात, अशें ताणें सांगलें.
ताणें गायिल्ल्या गीतांचो व्हिडियो तुमका ताच्या Shiv Naik ह्या युट्यूब चॅनलार आनी Shivv___ ह्या इंस्टाग्रामाचेर पळोवंक मेळटलो. तशेंच जर कोणाकूय तुमचें संगीत रिकाॅर्ड करूंक जाय जाल्यार तुमी ताच्या Shivatva स्टुडियोंत वचून रिकाॅर्ड करूं शकतात.
– विष्णू नार्वेकार
7709868431
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
