भांगरभूंय | प्रतिनिधी
कोणीही यावे आणि टपली मारून जावे, असो एक आदलो मराठी खेळ आसा. आमचे कोंकणी भाशेची अदीं मदीं तशी अवस्था जाता. पखवाजा सारकी. दोनूय वटेनच्यान तो वाजयतात. वर्साक 2 -3 फावटीं कोणतरी तिची कळ काडटा, विटंबणा करता…. आनी चडूच आंगलट आयलें काय माफी मागून मेकळो जाता. पोरूं वेंचणुके वेळार तृणमूल काँग्रेसीचो रोमी कोंकणींतलो ‘गोणीची (गोंयची) नवी सकाळ’ हो फलक बरोच गाजिल्लो. उपरांत तो नीट केलो. दाबोळी विमानतळाचेरुय धुम्रपाना विशींचे तांबडे कोंकणींतले तक्टे लागिल्ले. रस्त्या कडेचे सायनबोर्ड, विमानतळा वयले तक्टे, डिजीटल फलक, तयार जायराती (आर्टवर्क), मार्ग फलक लागतात, तातूंत व्याकरणाची वा उतराची चूक आसताच. मुंबय, दिल्ली, बंगळुरूच्यान हे फलक येतात, अशें म्हणटात. मात, गोंयांत जशी कोंकणी बरयतात, उलयतात, तशे ते नासतात. बरें कोंकणीच्या हेर शैली, बोलींत तरी ते आसतात? चडशे फावट संवसारांक खंयच आयकूंक, वाचूंक मेळची ना, असली ती कोंकणी आसता! आतां धावेचे परिक्षेच्या पेपरांत कोंकणीक नखलामी जाल्या. व्याकरणाच्यो, उतरांच्यो, टायपिंगाच्यो… एकूणच प्रुफ रिडिंगाच्यो चुको तातूंत आसात. शालांत मंडळ म्हणटा, 1- 2 चुको आसात. आमी ताचो 1 मार्क सगल्यांक दितले. तर पालक सांगतात उण्योच 26 चुको आसात. सादारण 10 ते 15 मार्कांचेर उदक सोडचें पडटले.
धावी, बारावेचे पेपर नामनेचे शिक्षक काडटात. तो तयार जातकच वाचून पळोवचो आसता. कारण खांप्या बरोवप्यां कडल्यान चुको जातात. नजरचुकीन व्हडली चूक जावं येता. दिसपट्टो मजकूर तयार करपी दिसाळ्यांनी चुको जातात, लेखकूय एकदां बरयलें, काय सहसा वाचून पळयनात, कांय जाण एके ओळींतल्या 15 उतरांनी तीन तरी चुको करतात. पूण हें परिक्षेच्या पेपराचें प्रकरण गंभीर. विद्यार्थ्याचें सांसणाचें लुकसाण जावं येता. 1- 2 गुणांक लागून ताच्या करियराचें तारूं भलतेच कडेन पावूं येता. तेन्ना संबंदीत शिक्षकान शांत चित्तान, मन लावन तो पेपर तयार करपाक जाय. चार फावटी वाचून पळोवपाक जाय. 25 वर्सां पयलीं दिसाळ्यांनी उपसंपादकांनी बरयिल्लो मजकूर दुसरे टायप करताले आनी प्रूफ रिडर वाचून करेक्शनाक दिताले. आयच्या तंत्रज्ञान युगांत टायप करप, वाचप, चुको काडप हें सगलें काम एकलो उपसंपादक करता. घडये परिक्षेचे पेपर काडपी वेगळे आनी टायप करपी वेगळे आसचे नात. कारण सगलेच आतां टायपिंग शिकल्यात. म्हणटकच धावेचो कोंकणी पेपर एकल्यानूच फायनल केला आसतलो. काय बरोवपी, टायप करपी वेगळे आशिल्ले?
शालांत मंडळान एकूच म्हत्वाची चूक जाल्या. तिचो एक गुण सगल्यांक दितले अशें म्हणलां. बाकीच्यो चुको विद्यार्थ्यांक समजतल्यो, अशें ताका दिसता. आनीकूय म्हत्वाच्यो चुको आसात, हें पालकांनी पटोवन दिल्यार घडये तें आनीक गुण दिवपाक तयार जायत. पेपर काडपी शिक्षकाचेर कडक कारवाय करपाची घोशणा मंडळान केल्या. (तो गोंयकार कोंकणी शिक्षक आसल्यार कितें प्रतिक्रिया येतली काय?) ती बेगीन जावची. चड करून हो पेपर कोंकणी कळनाशिल्ल्या शिक्षकान काडला आनी कोणाक तरी टायप करपाक दिला. ताणें वा तिणें घरा वचपाच्या बोवाळांत धडाधड तो मारला आनी कोणेच वाचिनासतना पेपर फायनल केला. अशें घडूं येता. तशें आसत जाल्यार हो गुन्यांव जालो. आपूण शिक्षक, बातम्यो बरोवपी पत्रकार न्हय. आनी आपूण बरयता तो परिक्षेचो पेपर, बातमी- लेख न्हय, हाची जाण संबंदीत पेपर काडप्याक आसपाक जाय आशिल्ली. रिवणाचें रिवजां- खिणां, आसाचें आला, भुंयाराचें भुरोरां, ह्याचें घ्या, तुवेंचें लुवें, बांयंतचें बोयत अशें त्या पेपरांत छापलां. आनीकूय उतरां आसात, जीं पृथ्वी वयल्या खंयच्याच कोंकणीभाशकांनी केन्ना आयकूंक नासतलीं!
कोंकणीचो अणकार करपी, प्रूफ रिडींग करपी सरकारी, खाजगी वेवसायिक आसात. शालांत मंडळांत, कोंकणी शिक्षक मळाचेर 25 जाण तरी व्याकरण शुद्ध कोंकणी बरोवपी आसतलेच. दर्जेदार, नितळ कोंकणी बरोवपी कांय लेखक आसात. कोशकार आसात. कोंकणीचो पेपर, तक्टो, सायनबोर्ड, मार्ग फलक, सुचोवणी तक्टो तयार करतना तांची मजत घेवप कमीपणाचें न्हय. हें काम मुफत करून दिवपी निसुवार्थी कोंकणी आपवावुरपीय आसतले. निदान हाचे मुखार शिक्षणाच्या मळा सयत हेर कडेनूय कोंकणीक नखलामी जावची न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
