भांगरभूंय | प्रतिनिधी
७ जाण हॉस्पिसिओंत, १२ जिमेसींत दाखल
मडगांव : कुटबण आनी मोबोर ह्या जेटी वाठारांत सध्या काॅलेराचे १७२ दुयेंती आसात. ७ जाण हॉस्पिसिओत जाल्यार १२ जाण जीएमसींत उपचार घेतात. ट्रॉलर्सां वेल्यान आनीकूय दुयेंत मेळपाक शकतात. ताका लागून परिस्थिती नियंत्रणांत आशिल्ल्याचें म्हणपाक शकना. सगळे तरेची जतनाय घेतात, अशें मत डॉ. उत्कर्ष बेतोडकार हांणी उक्तायलें.
जिल्लोधिकारी कार्यालयांतले बसके उपरांत डॉ. बेतोडकार हांणी, कॉलराची साथ नेमकी खंयच्यान सुरू जाली हे खबर ना. मात वाठारांत आनी वयक्तीक नितळसाण दवरिना जाल्यार ओकूंक आनी भायरां जावपाक सुरवात जाता. कॉलरा झाल्या उपरांत वेळार उपचार जावपाचीय गरज आसता. आतां मेरेन मरण आयिल्ल्या कामगारांच्या शरीरांतलें उदकाचें प्रमाण उणें जाल्ल्याचें दिसून आयलें. ताका लागून बोटीवेल्या कामगारांक ओआरएस सयत हेर वखदां दितात. जाका लागून शरिरांतलें उदक वेवस्थीत रावपाक मजत जावं येता आनी उपचारा खातीर तांकां परत दर्यादेगेर हाडूं येता. बाळ्ळी भलायकी केंद्रा वतीन योग्य त्यो सुचवण्यो, जागृताय आनी जतनाय घेतात अशें तांणी सांगलें.
कुटबण आनी मोबोर जेटीचेर सुमार १७२ दुयेंती मेळ्ळ्यात. हातुंतल्या ३३ जाणांचेर उपचार सुरु आशिल्ल्यान दक्षीण गोंय जिल्लो हॉस्पिटलांत ७ आनी गोंय वैजकी म्हाविद्यालयाच्या हॉस्पिटलांत १२ दुयेंती उपचार घेतात. कॉलराची साथ सुरु जाले उपरांत अचकीत ३० ते ३५ दुयेंती एकाच वेळार मेळपाक लागले. ताका लागून उपचार दिवपा खातीर गरजेचे उपाय केल्यात. स्वतंत्र नितळसाण घरां उबारतात. दिसांतल्या ६ फावटीं नितळसाण करता. तशेंच दुयेतींक नितळ वातावरणांत दवरता. भलायकी खात्यान कॉलरा काबार करपाक गरजेचे उपाय केल्यात. सध्या दुयेतींचो आंकडो उणो जातना दिसता. मात एकाद्रे ट्रॉलर्सचेर दुयेंती आसल्यार दुयेतींचो आंकडो अचकीत वाडपाकूय शकता. ताका लागून सध्या तरी परिस्थिती नियंत्रणांत आशिल्ल्याचें म्हणपाक शकना, अशेंय डॉ. बेतोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
