भांगरभूंय | प्रतिनिधी
‘हीट अॅण्ड रन’ ख्यास्त नेमा आड देशव्यापी सुरू आशिल्लें आंदोलन
गोंयच्या ट्रक धनयांनीय संपांत वांटेकार जावपाचो केल्लो निश्चेव
म्हापशें: हीट अॅण्ड रन ख्यास्तीच्या नेमा आड देशभरांतल्या ट्रक चालकांनी आंदोलन सुरू केल्लें, पूण केंद्र सरकारान हीट अॅण्ड रन कायद्यांत बदल करपाचें उतर दिल्ल्यान ट्रक धनयांनी संप फाटीं घेतलो. काल (मंगळारा) तांची आनी गृह मंत्रालय प्रतिनिधींची बसका जाली. हे फाटभुंयेर मंगळारा मध्यान रातीं 12 ते बुधवारा मध्यान रातीं 12 मेरेन गोंयच्या ट्रक चालकांनी ट्रक बंद संप करपाचो निश्चेव केल्लो. ह्या संपांत टेम्पो, पर्यटक टॅक्सी, रिक्षा आनी हेर भाडें मारपी वाहन चालकांनी वांटेकार जावचें अशें आवाहनूय तांणी केल्लें.
मजगतीं, केंद्र सरकारान हाडिल्ल्या नव्या मोटार वाहन कायद्या प्रमाण हाचे मुखार अपघाताक जापसालदार ट्रक चालकाक 1 वर्सांची बंदखण वा सात लाख रुपयांचो दंड अशी शिक्षेची तरतूद केल्या. ह्या कायद्या खाला देशभरांत विरोध जायत आसा. हो नवो कायदो रद्द करचो अशी मागणी ट्रक चालकांची आसा.
सरकारान ह्या कायद्यांत तत्काळ सुदारणा करची अशी मागणी करून ट्रक चालकांनी देशभरांत आंदोलन सुरू केलां. देशांतल्या कांय वाठारांनी हें आंदोलन चिगळ्ळां.
ट्रक चालक अमीत अस्टीकारान म्हणलें, देशव्यापी आंदोलनांत गोंयचे ट्रक चालकूय वांटेकार जाल्यात. हे खातीर मंगळारा रातीं 12 ते बुधवारा रातीं 12 मेरेन आमी ट्रकांची येरादारी बंद दवरतले. नव्या मोटार वाहन कायद्या प्रमाण हीट अॅण्ड रन अपघात प्रकरणांत 1 वर्साची बंदखण वा 7 लाख रुपया दंड अशी तरतूद आसा. आमी उण्या पगाराचेर काम करतात. अशा वेळार हो दंड आमी कसो आनी खंयच्यान भरतले. हो कायदो रद्द करचो, वा तातूंत सुदारणा करची हे मागणे खातीर ट्रक चालक संघटणेन हो संप सुरू केला.
आजू हळ्ळीकरान म्हणलें, मोटें वाहन आशिल्ल्यान चुकून एखादो अपघात घडटा. अपघाता वेळार व्हड प्रमाणांत जमाव एकठांय जाता, आनी ह्या जमावा कडल्यान मार पडचो न्हय म्हूण आमकां वाहन सोडून पळ काडचो पडटा. कारण सगलेच जाण ट्रक चालकाची चूक समजतात. आमी ट्रक चालक 10 ते 15 हजार रुपया पगाराचेर नोकरी करतात. जर आमचे कडेन 7 ते 10 लाख रुपया आशिल्ले जाल्यार आमी काम कित्याक करतले आशिल्ले. इतल्या पयशांनी उद्देग धंदो सुरू करपाचे. ह्या नेमांत बदल जावचो हे खातीर अखील भारतीय चालक संघटणेक आमी तेंको दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
