भांगरभूंय | प्रतिनिधी
नवी दिल्ली, खबरां संस्था ः केंद्रीय सशस्त्र पुलीस दळांची भरती परिक्षा हिंदी आनी इंग्लीश सयत 13 भाशांनी जातली. ही परिक्षा पयलेच खेपे इतल्या भाशांनी जातली. हांतूत कोंकणी भाशेचोय आस्पाव आसा.
केंद्रीय राखीव पुलीस दळ, शीम सुरक्षा दळ आनी केंद्रीय उद्देगीक सुरक्षा दळां सयत अर्द सैनिक दळां खातीर 10 फेब्रुवारी ते 7 मार्च मेरेन ही प्रक्रिया सुरू आसा. हातूंत 128 शारांतल्यान 48 लाख उमेदवार परिक्षा दितात. ही परिक्षा कोंकणी, मराठी सयत आसामी, बंगाली, गुजराती, मलयाळम, कन्नड, तामिळ, तेलगू, ओडिया, उर्दू, पंजाबी आनी मणिपुरी भाशांनी जातली. वेगवेगळ्या 13 प्रादेशिक भाशांनी परिक्षा घेवपाचो निर्णय इतिहासीक आसा आनी ताका लागून देशांतले चडांत चड तरणाटे ही परुक्षा दितलें अशें परिपत्रकांत म्हणलां.
हे खातीर केंद्रीय गृह मंत्रालय आनी कर्मचारी निवड आयोग हांचे मदीं कबलात जाल्या. देशांतले लाखांनी तरणाटे ह्यो परिक्षा दितात. प्रादेशिक भासांचो आस्पाव केल्यान आतां हे तरणाटे बरे तरेन परिक्षा दिवपाक शकतले. तशेंच दरेका उमेदवाराक समान संद मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
