भांगरभूंय | प्रतिनिधी
खबरां संस्था
लंडनः भारत आनी इंग्लंड हाचे मदीं 1 तें 5 जुलय मजगतीं टॅस्ट मॅच जावपाची आसा. मात पंगडाचो कॅप्टन रोहीत शर्माक कोरोना संसर्ग जालां. भारतीय क्रिकेट नियामक मंडळान (बीसीसीआय) आपल्या अधिकृत हँडलाचेर ही म्हायती दिल्या. ताका लागून पंगडाचें फुडारपण कोण करतलो हो प्रश्न उप्रासला.
शेववारा केल्ले रॅपीड अँटिजन चाचणेत रोहीत कोरोना पॉझिटिव्ह मेळ्ळो. तो सद्या पंगडाच्या हॉटेलांत विलगीकरणांत आसा. बीबीसीआयचो वैजकी पंगड ताचेर नदर दवोरून आसा. तो टॅस्ट मॅचींत खेळपाक शकतलो कांय ना हे विशीं कांय सांगपाक जायना. तो खेळपाक शकलो ना जाल्यार ऋषभ पंत व जसप्रीत बुमराह हांचे कडेन पंगडाचें फुडारपण आसतलें. चेतेश्वर पुजारा हाचोय पर्याय आसा.
फाटल्या सप्तकांत स्पिनर आर आश्विनाक कोरोनाची लागण जाल्ली. ताका लागून तो पंगडा वांगडा इंग्लंडाक वचपाक शकलो ना. विराट कोहलीक कोरोना लागण जाल्या अशी खबर सामकार आयिल्ली. आतां रोहिताक कोरोना जाल्ल्यान भारतीय पंगड वेवस्तापनाच्या हुस्क्यांत भर पडल्या.
इंग्लंडा आडचे पांच टॅस्ट मॅचीचे माळेंत भारत 2-1 असो फुडें आसा. पोरू सुरू जाल्ली ही माळ कोरोनाक लागून अर्दवट सोडची पडिल्ली. ते माळेंतली निमणी टॅस्ट आता खेळयतले. एजबस्टन हांगा जावपी ही टॅस्ट निर्णायक आशिल्ल्यान ती म्हत्वाची आसा. रोहीत खेळपाक शकलो ना जाल्यार शुभमन गील वांगडा ओपनिगांक कोण वतलो हे प्रश्न उप्रासतलो. ओपनर केएल राहुल दुखापतीक लागून पंगडा वांगडा ना. हनुमा विहारी हो ओपनिंगा खातीर एक पर्याय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.