भांगरभूंय | प्रतिनिधी
मिल्टन फर्नांडीसः पांचव्या दिसाय सांग्यार शेतकारांचें धरणें आंदोलन
भांगरभूंय । प्रतिनिधी
सांगें: सांग्यार सध्या योग्य बसस्टॅण्ड ना. शिक्षक नाशिल्ल्यान शाळा बंद पडटात. रस्ते सारके नात. साधन सुविधांचो उणाव आसा. ह्या गजालींचेर आडनदर करून सांगेंकारांक तशेंच गोंयकारांक कुस्कुटाचो फायदो नाशिल्लो प्रकल्प आमकां नाका, अशें शेतकार मिल्टन फर्नांडीस हांणी सांगलें.
आयआयटी प्रकल्पा आड पांचव्या दिसा सांगें बचाव समिती बतीन दांडो सांग्यार शेतकारांच्या धरणें आंदोलनाक आनिकूय बळ मेळ्ळां. फाटल्या कितल्याशाच दिसां सावन ह्या प्रकल्पाक थळावे शेतकार विरोध करतात. सैम, दोंगर, शेतां पेड्डेर करून, शेतकारांच्या पोटाचेर पांय दवरून हो प्रकल्प नाका, अशें सांगून पोटतिडकीन सांगून लेगीत सरकार आयकून घेना, अशें शेतकारांचें म्हणणें आसा. सुमार 60 शेतकारांनी धरणें आंदोलन केलां.
‘सैमीक शेती’ ह्या विशयाचेर दोनापावला कृशी खात्यान खाशेली कार्यावळ आयोजीत केल्ली. राज्यांतल्या चडांत चड शेतकारांनी सैमीक पद्दतीन शेती करपाक प्राधान्य दिवपाक जाय, अशें ते कार्यावळींत मुख्यमंत्री डॉ. प्रमोद सावंत उलयल्यात. चडांत चड कृशी उत्पादन घेवपाक जाय जाल्यार मुख्यमंत्री सांग्या वयलीं शेतां- भाटां, सैमाची नासाडी करून, दोंगर कांपून हो प्रकल्प कित्याक हाडपाक सोदता? एके वटेन शेतां कसात अशें सांगपी मुख्यमंत्री सांग्यार काँक्रिटाचें बांदकाम कित्याक करपाक सोदता, अशें प्रस्न शेतकार मिल्टन फर्नांडीस हांणी उपस्थीत केल्यात. प्रधानमंत्री नरेंद्र मोदी शेतां रोयात अशें सांगता. तांकां गरिबांची आनी शेतकारांची समस्या खबर आसा. पूण थळावे आमदार हे गजाली कडेन आडनगर करता आनी गरज नाशिल्ले प्रकल्प हाडपाक सोदता, ही दुर्दैवाची गजाल. आमी आमचें सैम राखपा खातीर सदांच एकवटान उबे रावतले, अशें आंतोनेता अल्वेरा हांणी सांगलें.
सरकारान विचार करचोः पायटी फर्नांडीस
सांग्यार उदरगत जायच, पूण ती फायद्याची आसपाक जाय. आयआयटी हो व्हड प्रकल्प. तातूंत गोंयचे फक्त 15 ते 20 भुरगे शिकतले. थंय बरी सुविधा मेळ्ळी ना जाल्यार ते दुसऱ्या राज्यांत वतले. मेजक्या भुरग्यां खातीर आयआयटी उबारप काय ना ताचो सरकारान विचार करपाक जाय. गोंय हें खूब ल्हान राज्य. ह्या प्रकल्पाक इतल्या व्हड प्रमाणांत जमीन दिवप चुकीचें. कांय जाणांक स्वताच्या अर्थीक फायद्या खातीर हो प्रकल्प जाय. सरकारान हाचेर बारीकसाणीन विचार करचो आनी शेतकारांक न्याय दिवचो, अशें पायटी फर्नांडीस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
