भांगरभूंय | प्रतिनिधी
कुडी विशीं उक्तायतात दुबाव
फोंडें: कुळें रेल्वें स्टेशना फाटल्यान फिलीप (मूळ झारखंड) नांवाच्या कामगाराची नग्न अवस्थेंतली कूड सांपडली, मंगळारा दनपारां सांपडिल्ले कुडी विशीं दुबाव उक्तायतात. कुळें पुलिसांनी घडणुकेचो पंचनामो करून कूड बांबोळे गोंय वैजकी म्हाविद्यालयाच्या हॉस्पिटलांत धाडून दिल्या.
मेळिल्ले म्हायती प्रमाण फिलीप हो कामगार रेल्वे स्टेशना कुशीक दिसवड्याचेर काम करतालो. ताका फीट मारून येत आशिल्ल्याची म्हायती पुलिसांक मेळ्ळ्या. पूण कूड पुरायपणान नग्न अवस्थेंत सांपडिल्ल्यान दुबाव उक्तायतात.
पुलिसांनी ठशे तज्ञांक आनी वास घेवपी सुण्यांक आपोवन तपासणी केली. पूण तांकां कांयच सांपडलें ना. मरणा उपरांतचे तपासणी उपरांतूच मरण आयिल्ल्याचें कारण स्पश्ट जातलें. कुळें पुलीस स्टेशनाचे निरिक्षक सगूण सावंत हांच्या मार्गदर्शना खाला उपनिरिक्षक अजय धुरी ह्या प्रकरणाचो फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
