भांगरभूंय | प्रतिनिधी
भांगरभूंय । प्रतिनिधी
कुडचडेंः गोंयचो पयलो मुख्यमंत्री भाऊसाबय बांदोडकार हांच्या गोयचे उदरगती खातीर केल्ल्या वावरांतल्या तरणाट्यांनी स्फूर्त घेवपाक जाय. तांचो हो वावर चिरंतन दवोरपा खातीर दयानंद कला केंदाचे वांगडी जावचें अशें आवाहन कुडचड्यांतलो तरणाटो उद्देजक वरूण कुडचडकार हांणी केला. दयानंद कला केंद्रान भाऊसायबाचे 49 वे पुण्यतीथ निमतान केंद्राच्या सभाघरांत आयोजीत केल्ले कार्यावळींत मुखेल सोयऱो ह्या नात्यान भाऊसायबाक आर्गां ओपल्या उपरांत ते उलयताले.
शिक्षणीक प्रसारा खातीर भाऊसायबान राज्यांत सुरू केल्ल्यो प्राथमीक शाळा बंद पडपाचे वाटेर आसात हे खातीर केंद्रचो संस्थापक वांगडी लक्ष्मण मडगांवकार हांणी खंत उक्तायली. कांय वर्सां पयलीं दयानंद कला केंद्रान मराठी प्राथमीक शाळा सुरू करपाक विश्व हिंदू परिशदेक सुवात दिल्ली. ती शाळा सध्या उंचेल्या पांवड्यार पावल्या आनी ते शाळेंत शिकल्लो एक विद्यार्थी हे कार्यावळीक मुखेल सोयरो म्हणून मेळ्ळा अशें लक्ष्मण मडगांवकार हांणी ह्या वेळार सांगलें.
फुडल्या वर्सा भाऊसायबांची 50 वी पुण्यतीथ पाळटले. ते खातीर कार्यावळ घडोवन हाडपा खातीर सगल्यांनी सहाकार्य करचें अशें केंद्राचो अध्यक्ष मोर्तू नायक हांणी मागलें. केंद्राचो जोड सचीव नारायण नायक, भांडारी नवीन खांडेकार हांणी भाऊसायबाच्या फोट्याक फुलां हार घातले. ज्येश्ठ वांगडी सदानंद खांडेकार हांणी निमाणे उपकार मानले. कार्यावळीक चडशे ज्येश्ठ नागरीक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
