कुंकळ्ळेचो गणेशोत्सव धर्मीक एकचाराचें प्रतीक

भांगरभूंय | प्रतिनिधी

-डाॅ. प्रकाश कुराडे ः मंडळाच्या संपर्क कार्यालयाचें उक्तावण

भांगरभूंय प्रतिनिधी
मडगांव : कुंकळ्ळेचो सार्वजनिक गणेशोत्सव हो धर्मीक एकचाराचें प्रतीक. फाटलीं बारा वर्सां कुंकळ्ळे सार्वजनिक गणेशोत्सव मनयतात. ह्या उत्सवाक सगल्या धर्माच्या लोकां कडल्यान बरें सहकार्य मेळटा. कुंकळ्ळेचो गणेशोत्सव म्हणल्यार सर्वधर्म समभावाचें प्रतीक आसा अशें कुंकळळेचे समाजीक कार्यकर्ते तशेंच ज्येश्ठ डॉक्टर डाॅ. प्रकाश कुराडे हांणी सांगलें.
कुंकळळी, बाळळीच्या सार्वजनिक गणेशोत्सव मंडळाच्या संपर्क कार्यालयाचें आनी गणेशोत्सवा निमतान दवरिल्ल्या देणगी कुपन्साच्या उक्तावण सुवाळ्यांत ते मुखेल सोयरे ह्या नात्यान उलयताले.
ह्या वेळार माचयेर मानाचे सोयरे ह्या नात्यान सेवा निवृत्त पुलीस अधिक्षक टोनी फर्नांडीस, बाळळी पंचायतीचे आदले सरपंच रोहिदास नायक, युवा उद्देजक आनी मित्र प्रकाशनाचे वैभव फोंडेंकार, मंडळाचे संस्थापक अध्यक्ष ऑस्कर मार्टीन्स, अध्यक्ष सुनील फातर्पेकार, आदले अध्यक्ष कमलाक्ष प्रभुगांवकार,वांगडी छाया गंवडळकार, संदेश नायक, कृष्णा नायक, नझीर शेख, स्वामी हिरेमठ आनी हेर मानेस्त हांची उपस्थिती आसली.
डॉ. कुराडे हांणी आपल्या उलोवपांत गणेशोत्सव मंडळाच्या कार्याची तुस्त केली. मंडळान गांवांत जी धर्मीक एकचाराची देख घालून दिल्या ताका खूब म्हत्व आसा. ह्या मंडळान गणेशोत्सवा निमतान विंगड विंगड कार्यावळी आनी सर्ती आयोजीत करून कुंकळ्ळी वाठारांतल्या कलाकारांक आनी भुरग्यांक माची मेळोवन दिल्या. फाटलीं दोन वर्सां कोविडाक लागून गणेशोत्सव मनोवंक मेळूंक ना. अंदूं ह्या मंडळान तशी संद दिल्या. ताचो लाव कलाकारांनी घेवचो अशें आवाहन डाॅ. कुराडे हांणी केलें.
टोनी फर्नाडीस हांणी कुंकळळे सगल्या धर्माचे लोक एकचारान रावतात आनी एकामेकाच्या उत्सवांत व्हडा उमेदीन वांटेकार जातात हे खातीर खोस उक्तायली आनी हें मंडळ धर्मीक आनी सांस्कृतीक कार्यावळीं वांगडा समाजीक कार्य करता हे खातीर तांची तुस्त केली.
रोहिदास नायक हांणी आपल्या उलोवपांत मंडळाच्या उपक्रमाची तोखणाय केली. कार्यावळीचें सुत्रसंचालन सचीव विजय कुमार कोप्रे देसाय हांणी केलें. आदले अध्यक्ष कमलाक्ष प्रभुगांवकार हांणी मानेस्तांक येवकार दिलो जाल्यार अध्यक्ष सुनील फातर्पेकार हांणी उपकार मानले.