भांगरभूंय | प्रतिनिधी
थळाव्या लोकांची मागणी
न्हंयेच्या उदकाचो प्रवाह आडाविल्ल्यान हुंवार येवपाची शक्यताय
कुंकळ्ळी: कुंकळ्ळींतल्या न्हंयेच्या पात्रांत शिंपणावळ खात्या वतीन कायमस्वरुपी बांदिल्ल्या बंधाऱ्यांत अंदूंच्या पयल्याच पावसांत रानांतलीं झाडां व्हांवून आडकून उरल्यांत. हाका लागून ह्या न्हंयेच्या व्हांवपी उदकाक आडमेळीं निर्माण जाल्या. हे खातीर शिंपणावळ खात्यान वेळारूच हीं आडकून उरिल्लीं झाडां कुशीक काडपाची गरज असा. नाजाल्यार ही रानवटीं झाडां बंधाऱ्यांत आडकून उदकाचो प्रवाह आडावपाची शक्यताय थळाव्या लोकांनी उक्तायल्या.
कुंकळ्ळेंतल्या दोदोडें चिऱ्याबांद हांगासरली परिस्थितीय अशीच आसून हांगासरल्या बंधाऱ्यांतूय ल्हान व्हड झोंपा आडकून उरिल्ल्यान न्हंयेचो प्रवाह व्हड प्रमाणांत आडावन उरला. न्हंयेक हुंवार येत जाल्यार हुंवाराचें उदक गांवांत पावपाची भिरांत गांवकाऱ्यां मदीं पातळ्ळ्या. तेच बरोबर न्हंयेचे कुशीक आशिल्ल्या घरांकूय धोको उप्रासपाची शक्यताय गांवकाऱ्यांनी उक्तायल्या.
गिमाच्या दिसांनी शेती, बागायतीक उदकाची गरज आसता म्हूण न्हंयचेर, व्हाळाचेर बंधारे बांदले. पूण बंधारे बांदले म्हूण ताचे कडेन आडनदर करून उपकारना वर्सभर उदकाचो प्रवाह वेवस्थीत जाता काय ना हाचे कडेन शिंपणावळ खात्यान लक्ष दिवप गरजेचें आसा. पूण शिंपणावळ खात्या कडल्यान अशी कामां गंभीरतायेन घेनात अशी खंतूय गांवच्या लोकांनी उक्तायल्या.
थळावे नागरीक दिनेश देसाय हांणी सांगलें, दर वर्सा अशे तरेच्या प्रसंगाक आमकां नेमान तोंड दिवचें पडटा. बंधाऱ्यांत आडकून उरिल्लीं झाडां शिंपणावळ खातें वेळारूच कुशीक काडिनात. अशी परिस्थिती हांगासरल्या सगल्या न्हंयेच्या पात्रांतल्या बंधाऱ्यांत जायत आसता. न्हंयेच्या उदकाचो पयसुल्ल्या शेतांकूय उदकाची पुरवण जावची म्हूण बांदिल्ल्या कॅनलाचीय पावसा पयलीं नितळसाण जावप गरजेचें आसा. थंय लेगीत शिंपणावळ खातें लक्ष दिनाशिल्ल्याचें दिसून येता. शिंपणावळ खात्यान हातूंत लक्ष घालून बंधाऱ्यांतलीं झाडां कुशीक काडची अशी मागणी दिनेश देसाय हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
