भांगरभूंय | प्रतिनिधी
पणजी, प्रतिनिधी: दरेका शेतकारान किसान क्रेडीट कार्ड सुविधेचो लाव घेवपाक जाय. किसान क्रेडीट कार्ड हो दरेका शेतकाराचो कायदेशीर हक्क, अशें मुख्यमंत्री डॉ. प्रमोद सावंत हांणी सांगलें.
ते राष्ट्रीय कृशी आनी ग्रामीण विकास बँकेन (नाबार्ड) आयज पणजे आयोजीत राज्य पतपुरवण चर्चासत्राचे उक्तावण कार्यावळीक मुखेल सोयरे म्हणून उलयताले.
ह्या वेळार नाबार्डाच्या गोंय फांट्याच्या कार्यालयान तयार केल्ल्या स्टेट फोकस पेपर २०२४-२५ चें अनावरण मुख्यमंत्र्या हस्तुकीं जालें.
गोंयांत भाताच्या उत्पादनांत वाड जाल्या. तांदळाचेर प्रक्रिया करून तांदळांची निर्यात करपाची गरज आसा. नाबार्ड बँकेच्या वावराची तोखणाय करून नाबार्ड बँकेचे खासा करून राज्याच्या ग्रामीण वाठारांत मुळाव्यो सुविधां निर्माण करपा खातीर सदांच सहकार्य मेळ्ळें. कृशी आनी हेर उपक्रमांनी कुशळटाय वाडोवपा खातीर नाबार्डाचे मोलादीक योगदान आसा. नाबार्डान कृशी क्षेत्राचे उदरगती खातीर फकत आर्थिकच न्हय जाल्यार ज्ञानसंस्था म्हणूनय योगदान दिलां, अशें मुख्यमंत्र्यान फुडें सांगलें.
प्रधान सचीव (वित्त) डॉ. व्ही. कांदवेलू हांणी नाबार्ड बँकेन राज्यांतल्या महिला बचत गटांक रीण सुविधा उपलब्ध केल्ले खातीर बँकेची तोखणाय केली.
नाबार्डाच्या गोंय कार्यालयाचें महावेवस्थापक डॉ. मिलींद भिरुड हांणी मानेस्तांक येवकार दिलो.
ह्या वेळार मुख्यमंत्र्या हस्तुकीं दिवचल प्रोग्रेसिव्ह शेतकरी उत्पादक संस्थेचे विश्वभर गांवस, पेडणें म्हाल शेतकरी उत्पादक संस्थेचे उदय प्रभुदेसाय, बार्देस म्हाल शेतकरी उत्पादक संस्थेचे सुदेश मयेंकार, तिसवाडी म्हाल शेतकरी उत्पादक संस्थेचे प्रेमानंद म्हांबरे आनी सत्तरी म्हाल शेतकरी उत्पादक संस्थेचे आत्माराम शेट्ये हांचो ह्या वेळार भोवमान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
