भांगरभूंय | प्रतिनिधी
भांगरभूंय । प्रतिनिधी
मुरगांवः कायनान डिसोझा (60) ऊर्फ कासी हो ताच्या काटेबायणा हांगच्या घरांत आयतारा राती उसरां मेल्ले स्थितींत मेळ्ळो. ताच्या घरांतले भांगराचे दागिने ना जाल्ल्यान ताचो खून केल्ल्याचो दुबाव आसा. मुरगांव पुलीस ते नदरेंतल्यान तपास करपाक लागल्यात.
आयतारा रातीं 11.30च्या सुमाराक काटेबायणांत मोगाबाय लागींर रावपी कायतान ताच्या घरांत रगताच्या कोणात मरून पडल्लो. ताची कूड जमनीर दुबावीत तरेन पडिल्ली, तकलेक घाये पडल्ले. ताच्या सोयऱ्यान पुलिसांक खबर दिल्या उपरांत तांणी येवून पळोवणी केली. दक्षीण गोंयचे पुलीस अधिक्षक अभिषेख धनिया हांणी घडणुकेचे सुवातेक भेट दिवन तपासाचे नदरेन निरीक्षक राघोबा कामत हांका सूचोवण्यो केल्यो. तांच्या वांगडा पुलीस उपअधिक्षक राजेश कुमार आनी वास्कोचो निरीक्षक कपिल नायक हाजीर आशिल्ले.
कायतान जुरार पयशे दितालो. पयशांच्या दिवप-घेवपा वयल्यान ताचो खून केला असो पुलिसांचो अदमास आसा. ताच्यो तीन चल्यो लंडनांत स्थाईक जाल्यात. खूनाची खबर मेळटकूच मुरगांवचो आमदार संकल्प आमोणकार हांणी घरां वचून पळोवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.