काटांदराक वाटयतना कार उमथली
भांगरभूंय | प्रतिनिधी
पणजी, बातमीदार ः सध्या राज्यांत अपघातांचो आंकडो वाडत आसा. दर दिसां ल्हान व्हड अश्यां अपघातांची खबर आयकुपाक येता. दोन दिसां पयलीं 12 वरांच्या काळांत तीग जाणांक अपघातांत मरण आयलें.
आयज सकाळीं रेडेघाटी – सत्तरींत काटांदर मदीं आयिल्ल्यान ताका वाटयतना अल्टो गाडी रस्त्यार उमथली. प्रमोद फातर्पेकार (वेळूस – सत्तरी) गाडी चलयतालो. कोणांक कांय जावंक ना. गाडयेचें लुकसाण जालां. दोन दिसां आदि ह्याच रस्त्यार बोलेनो आनी स्प्लेंडर दुचाकी मदीं अपघात जाल्लो. तांतूत साईप्रसाद नायक हो जखमी जाल्लो.
मजगतीं, वाळपय ते होंडा ह्या रस्त्याची वायट स्थिती जाल्या. ह्या रस्त्यार गाडी चलोवप म्हळ्यार धोक्यांचे जाला. तशेंच वाळपय ते होंडा मदीं रेडेघाट हो पुराय वाठार रान वाठार आशिल्ल्यान रस्त्या कुशीक, रस्त्या मदीं जनावरां येतात. जांकां लागून गाडी चलोवप्यांक त्रास जातात आनी मागीर अपघात घडटात. तशेंच त्या वाठारांत माकडांचो आंकडो खूब प्रमाणांत वाडिल्लो आसा. नकळत झाडां वयल्यान ते गाडयांचेर उडयो मारतात. हाका लागूनय अपघात जातात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
