भांगरभूंय | प्रतिनिधी
भांगरभूंय । प्रतिनिधी
पणजीः काँग्रेस विधी मंडळ पक्षांत फाटल्या सप्तकांक फुटीचें जें नाटक जालें ताचे वयल्यान गोंयांत काँग्रेस पक्ष भाजपाची बी टीम आशिल्ल्याचें सिद्ध जालां अशें आम आदमी पक्षाच्या गोंय समितीचो उपाध्यक्ष अॅड सुरेल तिळवे हांणी सांगलें.
काँग्रेस आमदारांक फुटपा खातीर भाजपान 40 कोटींची ऑफर दिल्ली असो दावो आदले काँग्रेस प्रदेश अध्यक्ष गिरीश चोडणकारान केल्लो. ताची दखल घेवन काँग्रेस पक्षान ते खातीर भाजपाचेर कसली कारवाय केल्या असो प्रश्न तांणी विचारला.
कितें तरी व्हडलें मेळचें हे खातीर भाजपाचे दिल्लीतले फुडारी आनी काँग्रेसाचे थळाव्या फुडाऱ्यां मदी उलोवणी पुराय जालीं ना देखून काँग्रेस विधी मंडळ पक्षांत फूट पडपाचें मुखार धुकल्लां असो दावो आपाचो दुसरो उपाध्यक्ष वाल्मिकी नायक हांणी केला. विधासभा अधिवेशन सुरू जालें तरी काँग्रेस पक्षाक विरोधी पक्ष फुडारी नेमप शक्य जालें ना ही तांचे खातीर लजेची गजाल आसा अशें तांणे म्हणलां.
विधासभा अधिवेशनांत लोकांचे प्रश्न मांडून भाजपा सरकाराचें अपेश लोकां सामकार हाडपाची बरी संद आशिल्ली. मात काँग्रेस पक्षाचे आमदारांनी आपल्या सुवार्थीची कार्यावळ चलयल्या असो आरोप नायक हांणी केला. काँग्रेस आमदारांत मदीं फूट घालपाच्या कारस्थानांत आपल्या वाट्या विशीं आमदार दिगंबर कामत हांणी खुलासो करपाक जाय अशें संदेश तळेकारान सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
