भांगरभूंय | प्रतिनिधी
हे देवा म्हाराजा, पांच वर्स पद्दती प्रमाण आमी तुज्या पांयां कडेन आयल्यात. आमी आमचो पक्ष कशेच सोडचे नात……. आमकां यश दी आनी राखण कर रे म्हाराजा. हय सायबा. धा मिनटांचें गाराणें सोंपतकच ते देवळांतल्यान मुमुरखे हांसत मशिदींत गेले. थंयच्या पिराक चादर चडोवन जबान दिली. मन्नत मागली… मागीर काॅपेलांत फुलां ओंपून खुरसा मुखार दिमी मारली…. धनया देवा, जीव गेलो तरी पक्ष सोडचे नात….. इतल्यान घांटी वाजपाक लागल्यो, अजान जाली. लोक जागे जाले. सदचेंच हें म्हणीत कुस बदलून परतून न्हिदले. घोरेवंक लागले. आतां परतून जागे जातले पांच वर्सांनी!!
गोयांत कांय वर्सां पयलीं घडिल्ली घडणूक काल परतून घडल्या. ते धा आसले, हे आठ… घडये फाल्यां आनीक तीन आसूं येतात!! पूण एकदाचे हे वावडेक पूर्णविराम मेळ्ळो. काँग्रेस विधीमंडळ पक्ष भाजपांत विलीन जालो. काँग्रेसीच्या दाव्या प्रमाण, दोन तृतियांश आमदार फुटले तरी पक्ष विलीन करपाक मेळना. आमी कायदेशीर कारवाय करतले म्हणटात ते. सध्या तरी काँग्रेस उदारी पडल्या इतलें मात स्पश्ट दिसता.
ह्या राजकी मोडणाक लागून काँग्रेस मुक्त गोंय मोहिमेची नांदी सुरू जाल्या. काँग्रेसीचे प्रभारी दिनेश गुंडू राव हांच्या म्हणण्या प्रमाण, भाजपा विरोधी पक्षांक सोंपोवपाक सोदता. पूण दुसरे वटेन विचार केल्यार, विरोधी पक्षूच जर स्वता जावन सोंपूक सोदता, जाल्यार ताका कोण आडायतलो? सध्या भारत जोडो यात्रा चलता. मात एकूण घडामोडी पळयत जाल्यार पयलीं काँग्रेस जोडो मोहीम चालीक लावपाची गरज आसा. पक्षीय नदरेन पळयल्यार गोंयच्या भाजपांत चडशे काँग्रेसीचे आमदार आसात. विविधता में एकता वा सर्वधर्मसभभाव हो खऱ्या अर्थान आयच्या राजकी मळाचेर दिसता. अमूक तत्वां आशिल्ले एके कडेन आनी तांचे विरोधी दुसरे कडेन हे दोन घटक आयज सगले बांद मोडून एकामेकांत भरसल्यात. हांगा तत्वां, विचार म्हत्वाचे काय सुवार्थ हें दरेकल्यान थारावचें.
पयलीं पक्षांतर केलें काय लोकांक म्हयनोभर वायट दिसतालें. धपक्यांतल्यान साबुदीर येवपाक स म्हयने तरी लागताले. मात हालींच्या वर्सांनी कोणाक कांयच दिसना जालां. उरफाटे लोक खोशी जातात. कारण लोकांचे, मतदारसंघाचे उदरगती खातीर आमी सत्ताधारी पक्षांत प्रवेश केला, अशें आया राम, गया राम जाहीर करतात. आतां गोंयांत नेमकी कोणाची उदरगत जाता तें कळटलें. ह्या फुडाऱ्यांक सामके लागीं आशिल्ले मात वल्लेंतूय धरनात आनी सुपांतूय उरनात, इतले आनंदी जाल्यात. पयस खंय तरी तांकां दुडू दुडू आवाज आयकूंक येता आसतलो. पक्षांतर केल्ल्या एकल्यान पद दिवंक नाशिल्ल्यान पक्ष सोडलो, अशें दोळ्यांत दुकां हाडून सांगलें. मजा म्हणल्यार तो आनी तें पद मेळिल्लो, दोगांयनी पक्षांतर केलां. मतदार हिस्पाभायर सुवार्थी जाल्ल्यान हीं पक्षांतरां मुखार जायत रावतलीं. फाल्यां दुसरो पक्ष सत्तेर येत जाल्यार परतून उडयो सुरू जातल्यो. दुख्खाची गजाल म्हणल्यार ह्यो लागमाडयो मारपाक मतदारूच तांकां वेंचून दितले. निमणो, पैसा फेको, तमाशा देखो.
ह्या सत्तानाट्यांत देवांचो मात गरज नासतना अपमान जालो. भक्तांक तोंड दाखोवपाक पसून बाबडे फाटीं फुडें जाता आसतले. एका पक्षबदलून खंय देवाची परवानगी घेवनूच हो निर्णय घेतला. देवान खंय ताका सांगलें, तूं जो निर्णय घेता तो घे. म्हजो तुका तेंको आसतलो. धन्य तो देव आनी धन्य तो भक्त. भ्रश्टाचाराक, पक्षांतराक तेंको दिता जाल्यार ह्या देवाक बरीं कामांय करप सहज शक्य जातलें. मात हो देव कोण तें त्या देवाकूच खबर. कारण तिनूय धर्मांच्या देवां मुखार आंगवणी, सोपूत जाल्यात.
ह्या आठ जाणां मदल्या कितल्या जाणांक मंत्रीपद मेळटलें, म्हामंडळां मेळटलीं तें पळोवपाचें. हांकां लागून सध्या त्या जाग्यांचेर आशिल्ल्यांक मात कदेलांचेर उदक सोडचें पडटलें. हे दीस म्हाळाचे. घटस्थापने मेरेन कसलींच बरीं कामां करीनात खंय. मागीर हें पक्षांतर जालां, तें बरें काय वायट काम? आतां विरोधांत 5-6 जाण उरल्यात. ही धांपिल्ली मूठ सवाय लाखाची काय सवाय रुपयाची हें येवपी काळूच दाखयतलो. गोंयचें राजकारण बदल्लां, इतलें मात खरें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
