काँग्रेस प्रभारी दिनेश रावूच घोटाळेबाज

भांगरभूंय | प्रतिनिधी

संकल्प आमोणकारः उमेदवारी खातीर घेतले कोट्यांनी रुपया

भांगरभूंय I प्रतिनिधी
पणजी : भाजपांत प्रवेश केल्ल्यान आमचेर काँग्रेस आरोप करता. पूण एकूय पयसो घेनासतना फक्त मतदारसंघाचे उदरगती खातीरूच आठूय आमदारांनी कसलेच अटी खेरीत भाजपांत प्रवेश केलो. सध्या आमचेर आरोप करपी काँग्रेस प्रभारी दिनेश गुंडू राव हांणीच विधानसभा वेंचणुकेंत कोट्यांनी रुपया घेवन कांय जाणांक उमेदवारी दिली. तशेेंच प्रदेशाध्यक्ष, विरोधी पक्ष फुडारी पद दितनाय तांणी पयशे घेतले, असो प्रत्यारोप भाजप आमदार संकल्प आमोणकार हांणी केलो.

पणजेंतल्या पक्ष कार्यालयांत शुक्रारा घेतिल्ले पत्रकार परिशदेंत ते उलयताले. भाजप फुडारी दामू नायक ह्या वेळार हजर आशिल्ले.
काँग्रेस प्रभारी दिनेश राव हांणी केन्नाच पक्षाचो विचार करूंक ना. वा कसल्याच गजालीची जापसालदारकी स्विकारूंक ना. गोंयांत फक्त अर्थीक सुवार्थ सादपाक ते येताले. काँग्रेसचे राष्ट्रीय सरचिटणीस के. सी. वेणुगोपाल हांचे वांगडा मेळून तांणी फाटले विधानसभा वेंचणुकेंत उमेदवारी दितना पयशे घेतले. बारा मतदारसंघांतल्या उमेदवारां कडल्यान तांणी कोट्यांनी रुपया घेतल्यात. ते भायर वेंचणूक काळांतल्या विवीध कामांची कंत्राटां आपल्या व्यक्तींक दिवन थंय लेगीत दोनशे कोटी परस चड रुपयांचो घोटाळो केल्लो, अशें आमोणकार हांणी म्हणलें.
फक्त गोंयांतूच न्हय, जाल्यार देशभरांत काँग्रेस पक्ष सोंपला. पक्षाचे दिल्लींतले फुडारी केन्नाच लोकांचे प्रस्न आयकून घेनात. अशा पक्षांत रावन मुरगांव मतदारसंघाची उदरगत करप अशक्य आशिल्ले. ते खातीरूच आपूण भाजपांत प्रवेश करपाचो निर्णय घेतलो, अशेंय आमोणकार हांणी नमूद केले.
आदले आमदार आग्नेल फर्नांडीस आनी आदले प्रदेश अध्यक्ष जॉन फर्नांडीस हांणी तिकेटी विकिल्ल्याचो आरोप केल्लो. आतां भाजपांत गेल्ले संकल्प आमोणकार हांणी तिकेटी विकिल्ल्याचो आरोप केलाे. उमेदवारी

खातीर प्रभारी दिनेश गुंडू राव आनी के. सी. वेणुगोपाळ हांणी कोट्यांनी रुपया घेतिल्ल्याचो आरोप संकल्प आमोणकार हांणी केला.
आठ आमदारांच्या भाजपा प्रवेशांत 250 ते 300 कोटींचो वेव्हार जाला. ह्या वेव्हाराची ईडी वरवीं चवकशी जावपाक जाय, अशी मागणी प्रदेश अध्यक्ष अमीत पाटकार हांणी केल्या. ह्या आरोपाक जाप दितना संकल्प आमोणकार हांणी तिकेटी विकिल्ल्याचो आरोप काँग्रेस फुडाऱ्यांचेर केला. काँग्रेसीचे प्रभारी दिनेश गुंडू राव आनी के. सी. वेणुगोपाळ हांणी उमेदवारी खातीर कोट्यांनी रुपया घेतले. हाका लागून निश्ठावान काँग्रेस कार्यकर्त्यांक उमेदवारी मेळ्ळी ना. बारा मतदारसंघांत तिकेटी विकल्याे, अशें संकल्प आमोणकार हांणी म्हणलें. काँग्रेसींत निश्ठावान कार्यकर्त्यांचेर अन्याय जाता. ते खातीर आपूण भाजपांत प्रवेश केल्ल्याचेय तांणी सांगलें.
विधानसभा वेंचणुके वेळार गिरीश चोडणकार प्रदेश काँग्रेस अध्यक्ष आशिल्ले. गिरीश चोडणकार, प्रभारी दिनेश गुंडू राव आनी रणनितीकार पी. चिदंबरम हांणी उमेदवारी दिवपा खातीर पयशे घेतल्यात. मायकल लोबो हे भाजपाच्या उमेदवारीचेर जिखून येवचे नाशिल्ले. पयशे दिवन तांणी काँग्रेसीची उमेदवारी घेतली, असो आरोप आग्नेल फर्नांडीस हांणी केल्लो.

आग्नेल फर्नांडिसाच्या आरोपांक जाप दिवची : कामत
दिगंबर कामत हांणी शुक्रारा मुख्यमंत्री डॉ. प्रमोद सावंत हांची भेट घेतली. तशेंच दिल्लींत वचून केंद्रीय भाजप फुडाऱ्यांची भेट घेतिल्याची म्हायती तांणी दिली. दरेकी आमदाराक 30 ते 40 कोटी रुपया दिवन भाजपांत प्रवेश दिल्ल्याचो आरोप काँग्रेस फुडाऱ्यांनी केला. हाचेर तांणी थेट जाप दिली ना. आग्नेल फर्नांडिसान जे आरोप केल्यात, ताका पयलीं दिनेश गुंडू राव हांणी जाप दिवची, अशें दिगंबर कामत हांणी म्हणलें.