भांगरभूंय | प्रतिनिधी
राजभवनाचो रस्तो आडायिल्ल्याचो आरोप, सांजे वैयक्तीक हमीचेर सुटका
भांगरभूंय I प्रतिनिधी
पणजी : ‘नॅशनल हेराॅल्ड’ प्रकरणांत सध्या काँग्रेस फुडारी राहुल गांधी हांची ईडीन चवकशी सुरू केल्या. फाटले दोन दीस ही चवकशी चालू आसा. हाचो निशेध करपाक गोंय काँग्रेसीन राजभवना मुखार आंदोलन केल्ल्या प्रदेशाध्यक्ष अमीत पाटकार हांचे सयत काँग्रेसीच्या 26 कार्यकर्त्यांक राजभवनाचो रस्तो आडायिल्ल्याचो आरोप करून पुलिसांनी अटक केल्या. उपरांत सांजे ह्या सगल्यांची वैयक्तीक जामिनाचेर सुटकाय केल्या.
कांय वर्सां पयलीं बंद केल्ले ‘नॅशनल हेरॉल्ड’ प्रकरण ईडीन परतून एकदा भायर काडलां. ह्या प्रकरणांत काँग्रेस अध्यक्ष सोनिया गांधी अानी ज्येश्ठ फुडारी राहुल गांधी हांकां चवकशे खातीर समन्स धाडिल्ले. राहुल गांधी सेगीत दोन दीस ईडीचे चवकशेक हाजीर रावले. केंद्रांतलें मोदी सरकार सोनिया आनी राहुल गांधी हांका ‘टार्गेट’ करून सूडाचें कारण करतात, असो आरोप देशभरांतले काँग्रेस फुडारी, कार्यकर्ते करतात. ते खातीर ते रस्त्यार देंवल्यात.
राहुल गांधी ईडीचे चवकशेक हाजीर रावले उपरांत आक्रमक जाल्ल्या देशभरांतल्या काँग्रेस कार्यकर्त्यांनी बिरेस्तारा आपापल्या राज्यांनी राजभवना मुखार आंदोलनां सुरू केल्यात. ताचोच भाग म्हूण गोंय काँग्रेसीनूय आंदोलन केल्लें.
मजगतीं, अांदोलना पयलीं 10 जाणांचें शिश्टमंडळ राज्यपाल श्रीधरन पिल्लई हांची भेट घेवन तांकां निवेदन दिवपाचें आशिल्लें. पूण ताचे पयलीच राजभवनाचो रस्तो आडायिल्ल्याचो आरोप करून पुलिसांनी प्रदेशाध्यक्ष अमीत पाटकार, युवा काँग्रेस अध्यक्ष वरद म्हाड्डोळकार हांचे सयत 26 जाणांक अटक केली.
कारण नासतना पुलिसांनी केली अटकः पाटकार
राज्यपाल पिल्लई हांणी आमकां बिरेस्तारा सकाळीं 11 वरांचेर मेळपाची परवानगी दिल्ली. आमी राजभवनाचे दिशेन वतना राजभवना कडल्यान आमकां हे विशीं म्हायती दिवंक नाशिल्ल्याचे सांगून तशेंच आमचेर रस्तो आडायिल्ल्याचो आरोप करून पुलिसांनी अटक केली. कांय काँग्रेस कार्यकर्त्यांक मारपेट लेगीत केली, असो आरोप प्रदेशाध्यक्ष अमीत पाटकार हांणी केलाे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
