काँग्रेसींतली फूट टळ्ळी

भांगरभूंय | प्रतिनिधी

मायकल लोबो, दिगंबर कामत हांचे आड अपात्रताय याचिका

भांगरभूंय I प्रतिनिधी
पणजी : भाजपांत प्रवेश करपा खातीर आठ आमदारांची जुळवाजुळव जावंक नाशिल्ल्यान सध्या तरी काँग्रेस आमदारां मदलीं फूट टाळपाक पक्षाक येस आयलां. पक्षाच्या आमदारांक एकठांय दवरून फूट टाळपा खातीर पक्षाचे सचीव मुकूल वासनीक हे गोंयांत आयल्यात. आमी सगले जाण काँग्रेस पक्षा वांगडाच आसात, अशें मायकल लोबो सयत सगल्या आमदारांनी परत स्पश्ट केले.

काँग्रेसींत जावपी फुटीचे फाटभुंयेर दिगंबर कामत आनी मायकल लोबो हांंकां पक्षविरोधी कारवायां खातीर अपात्र थारावचे, अशी मागणी करपी याचिका काँग्रेसीन सभापती कडेन दाखल केल्या.
राजकी अस्थिरतायेचे फाटभुंयेर सोमारा अधिवेशनाक सुरवात जाली. विधानभवनांत लेगीत राजकी
घडणुको सुरू आशिल्ल्यो. प्रदेश काँग्रेस अध्यक्ष अमीत पाटकार तशेंच हेर काँग्रेस कार्यकर्त्यांची बरोच वेळ विधानभवनांत हाजेरी आशिल्ली.
मडगांवां बसका जाले उपरांत पणजेत पत्रकार परिशद घेवपाचे प्रयोजन आपणाक खबर ना. पावसाक लागून कळंगूट तशेंच शिवोली मतदारसंघांत शेतीचें बरेच लुकसाण जालां. हे लुकसाणीक मजत मेळची, म्हूण आमदार डिलायला मुख्यमंत्री डॉ. प्रमोद सावंत हांंकां मेळपाक गेल्ली. भेटी फाटल्यान हेर कसलोच हेत नाशिल्लो, अशें मायकल लोबो हांंणी सांंगलें.
तेच प्रमाण आमदार राजेश फळदेसाय हांणी आपूण काँग्रेस सोडचो ना, अशें सांगले. आयतारा आपूण मुख्यमंत्र्यांच्या बंगल्याचेर वचूंक ना. घरा आसलो. काँग्रेस विधिमंडळाची बसका रातीं उसरां जाली.
तेच प्रमाण आलेक्स सिक्वेरा हांणी सांगलें, आयतारा रातीं काँग्रेस हावसांत जाल्ले बसकेक हाजीर रावंक ना. आयतारा जाल्ल्या राजकी घडणुकांची आपणाक खबर ना. आपूण घरा आशिल्लो. पूण काँग्रेसी वांगडाच आसा, अशें तांणी सांगलें.
मजगतीं, विरोधी पक्ष फुडारीपदांत आपणाक स्वारस्य ना. आपणाक ह्या पदा वयल्यान मुक्त करचो, अशी मागणी आपणें पक्षा कडेन केल्ली. ह्या पदा खातीर दिगंबर कामत हांंच्या नांवाची आपणें शिफारस केल्ली. आपूण काँग्रेसी वांगडाच आसा. काँग्रेस पक्ष केन्नाच सोडचो ना, अशें मायकल लोबो हांंणी सांंगलें. अधिवेशन सुरू जावचे पयलीं माध्यमां कडेन उलयतना तांणी ही म्हायती दिली.शेनवार तशेंच आयतारा पक्षाच्यो बर्योच बसका जाल्यो. सगल्या बसकांंक आपूण हाजीर आशिल्लो. पणजे जाल्ले पत्रकार परिशदेक आपूण हाजीर रावचो ना, अशें आपणें कळयिल्ले.

भाजपाची सादूर भुमिका
काँग्रेस आमदारांच्या पक्षांतरा विशीं सत्ताधारी भाजपान सादूर भुमिका घेतल्या. काँग्रेसींत अंतर्गत झगडी सुरू आसात. तांचे कडेन आमचो कसलोच संबंद ना. काँग्रेसीन आपल्या आमदारांक सांबाळचे. आमी कोणाकूच आपोवंक ना. प्रदेशाध्यक्ष म्हूण आपले कडेन कोणी संपर्क करूंक ना, अशें प्रदेशाध्यक्ष सदानंद शेट तानावडे हांणी म्हणलें. भाजपा कडेन सध्या 25 आमदारांचे संख्याबळ आसा. ते खातीर आमकां हेर पक्षांतल्या आमदारांची गरज ना, अशें मुख्यमंत्री डॉ. प्रमोद सावंत हांणी सांगलें.

आपूण काँग्रेसींतूच,मात रिटायर्ड हर्ट : कामत
आपूण काँग्रेस पक्षांत आसा. आपूण रिटायर्ड हर्ट जाला, अशें आपणें प्रभारी दिनेश गुंडू राव हांंकांय सांंगलां. ज्येश्ठ आसून लेगीत विरोधी पक्ष फुडारीपद मेळ्ळे ना, म्हूण आपूण निरशेला, अशें दिगंबर कामत हांंणी सांंगलें. सध्या खंयच्याच पदाचो स्विकार करचो न्हय, अशें आपणें थारायला. आयतारा मडगांवां जाल्ले बसकेक आपूण हाजीर नाशिल्लो. बसकेक हाजीर रावचो ना, हे आपणें पयलीं कळयिल्ले. आमदार तशेंच हेर फुडारी मेळपाक आपल्या घरा आयले, अशें दिगंबर कामत हांंणी अधिवेशन सुरू जावचे पयलीं सांगलें.