भांगरभूंय | प्रतिनिधी
सुदिन ढवळीकारः कवळ्यां भुंयगत वीज केबल घालपाक सुरवात
भांगरभूंय । प्रतिनिधी
फोंडें: गोंयाक फुडल्या 5 वर्सांत अदीक विजेची गरज लागतली. भुंयगत वीज केबलांक लागून खूबश्यो समस्या सासणाच्यो सुटाव्यो जातल्यो. कवळें वाठारांत 8 हजार चौखण मिटर सुवातेंत वीज खात्याचें नवें उपकेंद्र उबारतले, अशी घोशणा वीज मंत्री सुदिन ढवळीकार हांणी केल्या.
कवळ्यां भुंयगत वीज केबल घालपाच्या कामाक सुरवात करपाच्या सुवाळ्यांत मंत्री ढवळीकार उलयताले. ह्या वेळार खासदार विनय तेंडुलकार, सरपंच मनुजा नायक, वसुंधरा तळावलीकार, वीज खात्याचे मुख्य अभियंते स्टिफन फर्नांडीस, जिल्हो पंचायत वांगडी गणपत नायक, प्रीय च्यारी, दामोदर नायक आनी हेर पंच माचयेर हाजीर आशिल्ले.
कुर्टीच्या वीज खात्याच्या केंद्रांत सुमार 65 कोटी रुपया खर्च करून ट्रान्सफोर्मर बसयतले. वीज समस्या सोडोवपाचो यत्न करतात. फोंडें म्हालाक बरी वीज सेवा दिवपाचोय यत्न चल्ला, अशें मंत्री ढवळीकार हांणी सांगलें.
सुदिन ढवळीकार हांणी मंत्री पदाचो दरेका खात्याक न्याय दिला. उदरगतीचीं कामां करतना केंद्र सरकारा कडल्यान गरजेचो आशिल्लो आदार लेगीत मेळटा. ताका लागून वीज खात्यांत फाटल्या एका वर्सांत व्हड बदल दिसला, अशें राज्यसभा खासदार विनय तेंडुलकार हांणी सांगलें.
भुंयगत वीज केबल घालपाचें काम सुरू आसतना थळाव्यांक कांय प्रमाणांत आडखळ जावं येता. मात लोकांनी बऱ्या कामाक आदार करपाची गरज आसा. कांय समस्या उप्रासल्योच जाल्यार ताची दखल घेतले. ताका लागून लोकांनी वीज खात्याच्या भुंयगत प्रकल्पाक आडखळ निर्माण करची न्हय, असो उलो मुख्य अभियंतो स्टिफन फर्नांडीस हांणी मारला.
जिल्हो पंचायत वांगडी गणपत नायक हांणी सांगलें, वीज मंत्री ढवळीकार हांच्या फुडारपणा खाला खूबशीं उदरगतीचीं कामां मार्गाक लागल्यात. फुडाराचो विचार करुनूच उदरगतीच्या कामाक चालना दिवपाचो वावर तांचे कडल्यान जाता, अशें तांणी सांगलें. दीपा मिरींगकार हांणी सुत्रसंचालन केकलें. मनुजा नायक हांणी येवकार दिलो. वसुंधरा तळावलीकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
