भांगरभूंय | प्रतिनिधी
मुंबय उच्च न्यायालयाच्या गोंय खंडपिठाच्या आदेशा वयल्यान कारवाय
भांगरभूंय | प्रतिनिधी
म्हापशें: मुंबय उच्च न्यायालयाच्या गोंय खंडपिठान कळंगूटे डान्सबार्र बंद करपाचे आदेश दिल्या उपरांत उपजिल्होधिकार्यांनी रोखडीच कारवायेक सुरवात केली. तांणी रोखडोच प्रदूशण नियंत्रण मंडळाक आदेश जारी केलो. उपरांत बार्देशच्या 7 मामलेदारांचे हाजेरींत मंडळान कळंगूटेच्या 11 डान्सबारांक कुलपां घातलीं.
कळंगूटे वाठारांत कांय कडेन बार अॅण्ड रॅस्टोरंण्टांनी जाल्यार कांय बेकायदेशीर डान्स बार्रां सुरू आसात, अशी जनहीत याचिका खंडपीठांत दाखल जाल्ली. हाचेर जाल्ले सुनावणे वेळार ‘पळोवणी करून परवाने नाशिल्लीं डान्स बार्रां रोखडींच बंद करात’ अशे निर्देश खंडपीठान प्रदूषण नियंत्रण मंडळाक दिल्ले.
सुदेश मयेंकार आनी कुंदन केरकार हांणी ही याचिका दाखल केल्ली. तातूंत तांणी राज्य सरकार, पर्यटन संचालक, उत्तर गोंय जिल्होधिकारी, उत्तर गोंय पुलीस अधिक्षक, उत्तर गोंय पुलीस तशेंच पर्यटन विभागाचे उपअधिक्षक, कळंगूटे पुलीस निरिक्षक, कळंगूटे पंचायत, अबकारी खातें, राज्य कर आयुक्त, गोंय राज्य प्रदूशण नियंत्रण मंडळ, पंचायत संचालक, बार्देस गटविकास अधिकारी (बीडीओ), नगरनियोजन खातें, उजो पालोवपी दळ, जेवण आनी वखदां प्राधिकरण हाचे सयत 13 डान्स बार धनयांक प्रतिवादी केल्यात. मजगतीं, मुख्यमंत्री डॉ. प्रमोद सावंत हांणीय डान्सबार्रां आड कारवायेची शिटकावणी दिल्या. डान्सबार्राच्या नांवाखाला पर्यटकांक लुटप्यांचेर आतां खर कारवाय करतले. अश्या आस्थापनांचे परवाने रद्द करतले. तांकां परत परवाने मेळचे ना, अशी शिटकावणी मंत्रीमंडळ बसकेंत मुख्यमंत्र्यांनी दिल्ली.
कुलूप घातिल्लीं डान्सबार्रां
1. पॉश नॉश, 2. डेव्हिलस्स, 3. कुडा मुफसा, 4. मैफील, 5. थ्री किंग्ज, 6. नेक्स्ट लेव्हल/ज्युपिटर, 7. नॉर्मस पब/ क्लब नो एस्केप, 8. ब्लॅक हार्ट/ब्रेकडावन, 9. 39 स्टेप्स, 10. ट्रॉपिकल लॉग्ज, 11. प्लॅनिटेन लायफ
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
