भांगरभूंय | प्रतिनिधी
भांगरभूंय । प्रतिनिधी
म्हापशेंः सूपूर्ण गोंय यात्रा उपक्रमा खाला गोंयचे राज्यपाल पी एस श्रीधऱन पिल्लय हांणी बिरेस्तारा कळंगुटे आनी शिवोले मतदारसंघाक भेट दिली. ह्या वेळार तांणी डायलिसीस आनी कॅन्सर दुयेंती मेळून 20 जाणांक अर्थीक मजतीच्या चॅकांचें वितरण केलें. कांय सुटके झुजारी, सैनीक आनी खेळगड्यांचो भोवमान केलो.
राज्यपालान कांदोळेच्या शांतादुर्गा देवळाक, सेंट लॉरेन्स चर्च, आग्वाद बंदखण संग्रहालय आनी शिवोलेंतले चर्चीक भेट दिली. शांतादुर्गा देवस्थान आनी शिवोले चर्ची वतीन तांचो भोवमान केलो. राजभवना वतीन कळंगुटे आनी शिवोले मतदारसंघाक जाय तें सहकार्य दितले. लोकांक बऱ्यो सुविदा मेळोवन दिवपा खातीर वावुरप ही लोक प्रतिनिधीची लागणूक आसा अशें पर्रा पंचायत सभाघरांत आयोजीत केल्ले कार्यावळींत राज्यपालान सांगलें. ह्या वेळार कळंगुटेचो आमदार मायकल लोबो, शिवोलेची आमदार डिलायला लोबो, पर्राचो सरपंच चंदानंद हरमलकार, जिल्लो पंचायत वांगडी कार्तिक कुडणेकार, शिवोले आनी कळंगुटे मतदारसंघांतले सरपंच, उपसरपंच आनी पंच वांगडी हाजीर आशिल्ले.
थेट लोकां मेरेन वचपी पिल्लय हे गोंयचे पयले राज्यपाल आसात. राज्यपाल हे केंद्र आनी राज्य सरकार हाचे मदलो दुवो आसता. ताचे खातीर केंद्राच्यो सुविधा आनी अर्थीक मजत मेळपाक शकता अशें अशे मायकल लोबो हांणी सांगलें. डिलायला लोबो हांचेय उलोवप जालें. हाना वाझ हिणे काडिल्लें पर्रा माडांनी हांगचे सैम चित्र राज्यपालाक उपसरपंच डॅनिलय लोबो हांचे हस्तुकीं भेटयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
