भांगरभूंय | प्रतिनिधी
पोरण्यां कागदपत्रांचें डिजीटायजेशन तीन म्हयन्यांत सुरू
भांगरभूंय I प्रतिनिधी
पणजी : सरकाराच्या सगल्या कल्याणकारी येवजण्यांचो नियाळ घेवन तांतूंत गरजेचें बदल वा दुरुस्ती करपाची घोशणा समाज कल्याण खात्याचे मंत्री सुभाष फळदेसाय हांणी केली. मोडिल्या तशेंच आदल्या देवळांची म्हायती घेवप सुरू आसा. मोडिल्या देवळांचें परतून बांदकाम जातलें, अशेंय तांणी सांगलें.
समाज कल्याण, न्हंय येरादारी, पुराभिलेख खात्याच्या मागण्यांचेर ते उलयताले. सरकाराच्यो 60 वयर कल्याणकारी येवजण्यो आसात. कांय येवजण्यांक सामको उणो प्रतिसाद मेळटा. ह्या येवजण्यांचो सरकार नियाळ घेतलें. येवजण्यां विशीं जागृताय जातली. ज्या येवजण्यांचो लाव घेवप शक्य जायना, त्या येवजणेंत गरजेचें बदल जातलें.
हेर मागासवर्गीय तशेंच जायते लोक गरीब आसात. तांकां मागासवर्गीय येवजणेचो लाव मेळप शक्य जायना. गरीबांक येवजण्यांचो लाव मेळचो, हे खातीर येवजणेच्या पात्रताय निकशांत बदल जातलो, अशें मंत्री फळदेसाय हांणी सांगलें.
मजगतीं, दयानंद सामाजीक सुरक्षा येवजणेचे जून आनी जुलयाचे पयशे फुडल्या म्हयन्यांत मेळटले, अशें फळदेसाय हांणी सांगलें.
सुर्ला मशीद, सांखळी किल्लो, सप्तकोटेश्वर देवूळ हांचे संवर्धन, नुतनीकरणाचें काम सुरू आसा. चोडण ते पणजी मार्गाचेर इलेक्ट्रीक फेरीबोट सेवा ऑगस्टांत सुरू जातली. ते भायर 35 नव्यो फेरीबोटी हाडटले. सागरमाला प्रकल्पा खाला 9 जेटींची दुरुस्ती जातली. दुरुस्ती खातीर सीआरझॅड कडल्यान ना हरकत दाखलो मेळ्ळा. प्रकल्पाच्या दुसर्या टप्प्यात 7 जेटींची दुरुस्ती जातली. तशेंच दोन आधुनीक फेरीबोटी सुरू जातल्यो.
पुराभिलेख खात्यांत पोरणीं कागदपत्रां आसात. साडे चार ते स कोटी इतल्या पानांची जतनाय करपाची गरज आसा. डिजीटायजेशनचें काम तीन म्हयन्यांत सुरू जातलें. डिजीटायजेशना खातीर 300 ते 600 डीपीआय तांकयेचे स्कॅनर हाडचे पडटले. तीन वर्सांत डिजीटायजेशनाचें काम पुराय जातलें. पुराभिलेख खात्यान पोरणीं देवळां, चर्ची तशेंच दायज थळां आशिल्या 51 वास्तूंची निवड केल्या. हांचे संवर्धन जातले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
