भांगरभूंय | प्रतिनिधी
-कलेच्या शिक्षणा खातीर धोरण तयार जातलें
पणजी : तबला, हार्मोनियमा सयत विद्यार्थ्यांक कलेचें शिक्षण दिवपा खातीर पुराय वेळ शिक्षक नियुक्त करप सरकाराक शक्य ना. म्हालांतल्या कलाकारांच्या मजतीन वाठारांतल्या विद्यालयांक कलेचें शिक्षण दिवपाचो प्रस्ताव आसा. हे विशीं कला आनी संस्कृती खातें खासा धोरण तयार करतलें, अशें मुख्यमंत्री डॉ. प्रमोद सावंत हांणी सांगलें.
मुख्यमंत्री डॉ. प्रमोद सावंत हांचें हस्तुकीं राज्य सांस्कृतीक आनी युवा सृजन पुरस्कार भेटयले. कला अकादमीच्या दीनानाथ मंगेशकार सभाघरांत ही कार्यावळ जाली. नामनेच्यो अभिनेत्री आनी कलाकार मधुरा वेलणकर साटम, कला आनी संस्कृती खात्याचे उपसंचालक अशोक परब, कला आनी संस्कृती खात्याच्यो सचीव स्वेतिका सचन हे मानेस्त हाजीर आशिल्ले.
हार्मोनियम, तबला हाचे सयत कलेचें शिक्षण विद्यार्थ्यांक मेळपाक जाय. विद्यालयांनी अर्दवेळ कला शिक्षकांची नेमणूक केल्या. विद्यार्थ्यांक कलेचें शिक्षण दितलें जाल्यार शिक्षकांची गरज आसा. कलेचें शिक्षण दिवपा खातीर त्या, त्या म्हालांतल्या कलाकारांची मजत घेवपाचो प्रस्ताव आसा. विद्यालयांत वचून कलाकारांक विद्यार्थ्यांक शिकोवचे पडटले. हे विशींचें धोरण तयार जातलें.
आयच्या मोबायलाच्या युगांत वाचन संस्कृती तिगोवन दवरपाचें आव्हान आसा. हाका लागून दरेकी गांवांत वाचनालय सुरू जावपाक जाय. वाचनालया खातीर सरकारी अनुदान मेळटा, तरी ते फावोशे थारना. कांय एनजीओ स्वताच्या खर्चान करून वाचनालयां चलयतात. कलाकार तयार करपा खातीर सांस्कृतीक संस्था तशेंच हेर संस्थांचें व्हड योगदान आसा, अशें मुख्यमंत्र्यांनी सांगलें.
कला आनी संस्कृती खात्याचे संचालक सगुण वेळीप हांणी येवकाराचे उलोवप केले. उपसंचालक अशोक परब हांंणी उपकार मानले. गोविंद भगत हांणी सुत्रनिवेदन केले.
सांस्कृतीक पर्यटना खातीर कलाकारांचे सहकार्य
गोंय कलाकारांची खण. साहित्य, संगीत, भजन, नाटक हातूंत वांटो घेवपी कलाकार गोंयांत आसात. देवळां सयत सांस्कृतीक दायज आसा. अध्यात्मीक पर्यटना सयत सांस्कृतीक पर्यटन सुरू करप शक्य आसा. सांस्कृतीक पर्यटना खातीर कलाकारांच्या सहकार्याची गरज आसा, अशें मुख्यमंत्री डॉ. प्रमोद सावंत हांणी सांगलें.
मुख्यमंत्र्यांचो अश्वमेघ आडावप अशक्य: नरेश कडकडे
मुख्यमंत्री डॉ. प्रमोद सावंत हांच्या सरकाराचो अश्वमेघ आडावप आतां कोणाकूच शक्य ना. कला आनी संस्कृती खातीर डॉ. प्रमोद सावंत हांचें सरकार बरो वावर करता, अशें नरेश कडकडे हांणी सांगलें. राज्य सांस्कृतीक पुरस्काराचो स्विकार केले उपरांत ते उलयताले. नव्या पिळगेन कला आनी संस्कृतीचें कार्य फुडें व्हरपाक जाय, असो उलो तांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
