भांगरभूंय | प्रतिनिधी
मुख्यमंत्री सिद्धरामय्या हांची गोंय सरकाराक विनंती
सांगोल्डें घरां माडिल्लें प्रकरण
पणजी: सांगोल्ड्यां राबित्याक आशिल्ल्या कर्नाटकांतल्या नागरिकांची घरां मातयेभरवण केली. त्या घरांतल्या कुटुंबाचें जाता तितले बेगीन पुनर्वसन करचें. तशेंच पर्यायी वेवस्था जाय मेरेन अशीं घरां मोडून उडोवचीं न्हय अशी मागणी कर्नाटकाचे मुख्यमंत्री सिद्धरामय्या हांणी गोंयचे मुख्यमंत्री डॉ. प्रमोद सावंत हांकां केल्या.
मुंबय उच्च न्यायालयाच्या गोंय खंडपिठाच्या आदेशा प्रमाण सांगोल्ड्यां कोमुनिदादीचे सुवातेंत बेकायदो उबारिल्लीं 22 घरां कोमुनिदाद प्रशासकांनी मातयेभरवण केलीं. ह्या घरांत रावपी चडशे भोवसंख्य लोक कर्नाटकांतले आसात. ताका लागून हातूंत हस्तक्षेप करपाची मागणी मुख्यमंत्री सिद्धरामय्या हांणी गोंयचे मुख्यमंत्री डॉ. प्रमोद सावंत हांचे कडेन केल्या.
सांगोल्ड्यांतले हे कारवायेचे फाटल्या दोन दिसां सावन कर्नाटकांत खर पडसाद उमटत आसात. थंयचे खूबशे राजकी फुडारी तशेंच संघटणांनी कर्नाटकांतल्या नागरिकांची घरां मातयेभरवण केल्ल्याचो निशेध करपाक सुरवात केल्या. बंगळुरूंतले फुडारी गुरुदेव नारायणकुमार हांणी ह्या प्रकरणाचो निशेध नोंद करून कर्नाटक आनी गोंयच्या मुख्यमंत्र्यांक आनी तांच्या मंत्रीमंडळांतल्या सहकाऱ्यांक मातयेभरवण केल्ल्या घरांतल्या लोकांचें पुनर्वसन करपाची विनंती केल्या.
कन्नड सीमा विकास प्राधिकरणाचे वांगडी अशोक चंदर्गी हांणी मुख्यमंत्री डॉ. प्रमोद सावंत हांणी विस्थापीत कुटुंबां खातीर पर्यायी वेवस्था करतले अशें आस्वासन दिलां. मुख्यमंत्री डॉ. सावंत हे आस्वासन केन्ना पुराय करतले हाची आमी वाट पळयतात अशें सांगलें.
विस्थापितांचें कर्नाटकांत व्हरून पुनर्वसन करात: परब
कर्नाटकाचे मुख्यमंत्री सिद्धरामय्या हांणी कर्नाटक राज्य रस्ते येरादारी मंडळाचे (केएसआरटीसी) बशी धाडून गोंयांत बेकायदो घरां बांदून राविल्ल्या आनी बेकायदो कामांत घुस्पल्ल्यांक कर्नाटकांत व्हरचें आनी थंय तांचें पुनर्वसन करचें अशें सांगून रिव्होल्युशनरी गोवन्साचे फुडारी मनोज परब हांणी तांचेर खर टिका केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
