भांगरभूंय | प्रतिनिधी
म्हापशें: करासवाड्यार उद्देगीक वसणुकेंत म्हापशें पुलिसांनी ड्रग्स विरोधी कारवाये खाला डेल्टन दा कॉस्ता (27, सेंट सेबेस्तीयनवाडो, म्हापशें) हाका अटक करून ताचे कडल्यान 80 हजारांचो 850 ग्राम गांजो जप्त केलो.
उद्देगीक वसणुकेंत ड्रग्साचो विक्री वेव्हार जावपाचो आसा अशी म्हायती पुलिसांक मेळिल्ली. ते प्रमाण पुलिसांनी मंगळारा सांजवेळा सांपळो रचलो. दुबावीत आरोपी घडणूक थळार येतकूच पुलीस पंगडान दुबाविताक धरलो आनी ताची झडटी घेतली. त्या वेळार ताचे कडेन वयलो गांजो सांपडलो.
दुबाविता आड घुंवळे वखदां प्रतिबंधक कायद्या खाला गुन्यांव नोंद करून ताका अटक कली.
पुलीस निरिक्षक सीताकांत नायक हांच्या मार्गदर्शना खाला उपनिरिक्षक विराज कोरगांवकार, बाबलो परब, हवालदार सुशांत चोपडेंकार, तुकाराम शिरोडकार कॉन्सटेबल अक्षय पाटील, तुकाराम कांबळी आनी नितेश नायक ह्या पंगडान ही कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
