भांगरभूंय | प्रतिनिधी
खून केल्ल्याचो पुलिसांक दुबाव
बंगळुरू, खबरां संस्था : कन्नड अभिनेतो दर्शन थुगुडेपा (४७) आनी ताची जोडीदार, अभिनेत्री पवित्रा गौडा हांकां खुनाच्या आरोपा वयल्यान अटक. ताका म्हैसूरांतल्या ताच्या फार्महावसाचेर पुलिसांनी ताब्यांत घेतलो. ८ जूनाक रेणुका स्वामी हाचो खून केल्ल्याचो ताचेर आरोप आसा. रेणुकाची कूड कामाक्षीपाल्य- बंगळुरूंत एका गटारांत मेळिल्ली. सुण्यांक लागून हो प्रकार उक्तडार आयलो. एका फार्मास्युटिकल कंपनींत काम करपी रेणुका हाणें दर्शनाक लागीं आशिल्ले एके अभिनेत्रीक व्हाॅट्सअॅपाचेर बुरशे मॅसेज धाडिल्ले. ते तिडकींतल्यान हो खून जाला आसुये, अशें पुलिसांनी सांगलें.
स्वामी हो चित्रदुर्गाचो. पुलिसांनी आतां मेरेन ९ जाणांक अटक केल्या. आपल्या पुताचें पोरूं लग्न जाल्लें. तो म्हजो एकसुरो पूत. म्हाका न्याय दिवचो, अशें रेणुकाच्या बापायन पत्रकारांक सांगलें.
हो खून दर्शनान केला काय करपाक सांगलां, ताचो सोद पुलीस घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
