भांगरभूंय | प्रतिनिधी
वीज खात्यांतल्या कारभारा वयल्यान आलेक्स सिक्वेरा आक्रमक
भांगरभूंय I प्रतिनिधी
पणजी : धा वर्सां पयलीं नेमणूक पत्रां दिवन लेगीत कांय कंत्राटी लायमनांक अजून मेरेन वीज खात्यांत कायमस्वरूपी नोकरी मेळूंक ना. अजुनूय ते कंत्राटाचेर काम करतात, अशें आमदार अालेक्स सिक्वेरा हांणी सभाघराच्या निदर्शनाक हाडून दिलें. प्रस्नाक जाप दितना वीज मंत्री सुदिन ढवळीकार हांणी कार्मीक खात्या कडेन सल्लामसलत करून विचार करपाचें आस्वासन दिलां. कायमस्वरूपी नोकरी मेळपाची हमी मात तांणी दिवंक ना.
वीज खात्यांत 341 लायन हॅल्पर आनी 119 मिटर रिडर 12 वर्सां कंत्राटाचेर काम करतात. हातूंतल्या कांय लायनमनांक नोकरेची नेमणूक पत्रां लेगीत मेळिल्ली. तरी तरेकवार कारणाक लागून तांकां नोकरी मेळ्ळी ना. आमदार अालेक्स सिक्वेरा हांणी लक्षवेधी सुचोवणी मांडटना पॉल फर्नांडीस ह्या लायन हॅल्पराचें उदाहरण दिलें. हाका 2011त कायमस्वरूपी नोकरेचें नेमणूक पत्र मेळिल्लें. पूण अजून मेरेन तो कंत्राटाचेर काम करता.
पदां जाहीर जाले उपरांत कंत्राटी कामगारांनी परतून अर्ज करचे पडटात. तांची मुलाखत जाता. तांचे खातीर पिरायेची अट 5 वर्सां सदळ करपाची मेकळीक आसा, अशें मंत्री सुदिन ढवळीकार हांणी सांगलें.
कार्मीक खात्या कडेन मान्यताय घेतले उपरांत पिरायेची अट आनीक सदळ करपाक मेळटा काय? हे विशीं निर्णय जातलो. लायन हॅल्परां खातीर आतां लेखी परिक्षा घेतात. कांय कंत्राटी कामगार यत्ता चाैथी मेरेन शिकिल्ले आसात. ह्या कंत्राटी कामगारांक लेखी परिक्षा दिवप शक्य जातले काय? असो प्रस्न सिक्वेरा हांणी केलो. हाचेर लक्ष घालपाचें आस्वासन मुख्यमंत्री डॉ. प्रमोद सावंत हांणी दिलें.
कंत्राटी कामगारांची सविस्तर म्हायती सभाघरांत
कंत्राटाचेर काम करपी लायन हॅल्परांनी 7 ऑक्टोबर 2011 दिसा मुलाखत दिल्ली. 29 नोव्हेंबर 2011 दिसा तांकां ऑफर लेटरां दिली. 9 डिसेंबर 2011 दिसा तांची वैजकी चांचणी जाली. 22 डिसेंबर 2011 दिसा तांकां नेमणूक पत्रां दिली. 27 डिसेंबर 2011 दिसा ते कामार रूजू जाले. तरेकवार फांट्यांनी ते सेवेंत दाखल जाले. हे विशींचो आदेश 28 डिसेंबर 2011 दिसा जारी जालो. ते उपरांत वेंचणूक आचारसंहिता लागू जाली, म्हूण 6 जानेवारी 2012 दिसा तांची नेमणूक रद्द जाली. हातूंतल्या 14 जाणांनी खंडपिठांत याचिका दाखल केली. 21 नोव्हेंबर 2014 दिसा तांकां परत नेमणूक पत्रां दितलें, अशी हमी सरकारान खंडपिठांत दिली. नेमणूक पत्रां मेळिल्ले जे कोण खंडपिठांत वचूंक नात, ते अजून कंत्राटाचेर आसात. कांय जाणांची पिराय आतां 50 परस चड जाल्या. ही सविस्तर स्थिती अालेक्स सिक्वेरा हांणी सभाघरा मुखार मांडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
