भांगरभूंय | प्रतिनिधी
म्हजे म्हायती प्रमाण, कंत्राटी पद्दतीचेर आशिल्ल्या प्राध्यापकांक बरो ना जालो जाल्यार सीक लिव्ह ना. घडये तो केन्नाच दुयेंत पडपाक शकना आसतलो. दुसरें म्हणल्यार सुमार स म्हयन्यांनी….
आयज तरणाटे शिकून बेकार आसात. तांकां नोकऱ्यो दिवपाक आमचें सरकार अपेशी थारलां. वेंचणुके वेळार कांय जाणांक नोकऱ्यो मेळ्ळ्यात. कारण घडये, ते भयंकर हुशार आसतले. 90/95 टक्के गूण पडपा इतले. तांची हुशारी जोखपी आमचेच आमदार आनी मंत्री. आयज जायते जाण कंत्राटी पद्धतीचेर नोकरेक आसात. तांकां कायम करपाक सरकारा कडेन वेळ ना. कारण? कारण कांय ना, सादेंच. सरकार ‘विकास’ करपांत गुल्ल आसा. कोणाचो तें मात सांगप कठीण.
आमदार विरेश बोरकार हांणी विधानसभेंत सांगलें, कंत्राटी पद्धतीचेर आशिल्ल्यांक कायम करचे म्हूण. ताचेर जाप मेळ्ळी, तें करप शक्य ना…. आनी कंत्राटी पद्धतीचेर जे कोण आसात तांकां सगल्यो सरकारी सुविधा आनी हेर सवलती मेळटात. कसल्यो काय त्यो? ह्या कंत्राटी कामगारांचेर कंत्राट सोंपता तेन्ना जो मानसीक तणाव येता तो उतरांनी सांगप भोव कठीण. हो ताण, तणावूच ‘आमी साधन सुविधा म्हूण’ ह्या कंत्राटी कर्मचाऱ्यांक दितात, हें सांगपाक घडये आमचें मानादीक सरकार विसरलें आसूंक जाय.
म्हजे म्हायती प्रमाण, कंत्राटी पद्दतीचेर आशिल्ल्या प्राध्यापकांक बरो ना जालो जाल्यार सीक लिव्ह ना. घडये तो केन्नाच दुयेंत पडपाक शकना आसतलो. दुसरें म्हणल्यार सुमार स म्हयन्यांनी पयल्या चार म्हयन्यांचो पगार मेळटा. म्हणजे जानेवारी ते एप्रीलाचो पगार जुलयांत. कारण? परतूय कारण सादेंच, विकास करतना ते इतलें लक्ष केंद्रीत करतात की तांकां ह्यो गजाली पळोवप शक्यूच जायना. कंत्राटी पद्धतीचेर घेतिल्ल्या मनशा कडेन फुडल्यो सात पिळग्यो पोसूंक जाता इतलो पयसो आसा, अशें तांकां दिसता आसत घडये.
आतां हालीं जी म्हारगाय वाडल्या ती आमच्या लोकप्रतिनिधींक सोंसूंक जायना. तांकां तिचो त्रास जावंक लागला. ही म्हारगाय वाडपाक आमीच जापसालदार आसात अशें तांकां दिसूंक लागलां आसतलें. कारण? कारण तशें सादेंच, विकास! कोणाचो तें विचारचें न्हय. म्हणून तर आमदार, मंत्र्यांक हालींच पगारवाड मेळ्ळ्या. दिसाचो भत्तो 3 हजारां वयल्यान 4 हजार, मोटार एडवान्स 15 लाखां वयल्यान 40 लाख, हावसींग एडवान्स 30 लाखा वयल्यान 40 लाख, पॅन्शन 15 हजारा वयल्यान 30 हजार, पॅत्रोल कोटा म्हयन्याक 300 लिटरां वयल्यान 500 लिटर, वैजकी बिलां 3 लाखा वयल्यान 5 लाख. खरेंच हाकाच म्हणटात आमची उदरगत आनी होच खरो विकास. आमी तुमकां हेच खातीर तर वेंचून दिल्यात.
गोंय आमचे परस कोणूच बरें चलोवंक शकना हे गुंगेंत तुमी चलूंक लागल्यात. तुमी तुमचेंच एक विश्व तयार केलां. तातूंत तुमीच राजा आनी तुमीच प्रजा. म्हणल्यार राजान आपल्याक कसो फायदो जातलो तें पळोवपाचें आनी प्रजेचें बरें करपाचें आसता तेन्ना आपणेंच प्रजा जावपाचें आनी थंय लेगीत जोडपाचें.
तुमकां वेळ आनी काळ जाप दितलो. दुबाव ना. आमची ही अवस्था पळोवन आनी तुमचे कडच्यान आमची अशी अवस्था जाता, तें पळोवन काळजांतल्यान वायट दिसता. तरीय, आतां एकूच मागणें, देवान तुमचें कल्याण करूं!
अंबर प्रकाश नायक
70404 10639
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
