भांगरभूंय | प्रतिनिधी
येजमान ऑस्ट्रेलिया पंगडान मॅलबॉर्न क्रिकेट मैदानाचेर जाल्ले मॅचींत दक्षीण आफ्रिका पंगडाक दुसरे मॅचींत एक डाव आनी 182 धांवड्यांनी हारयलो. ह्या जैता सयत तीन टॅस्टींचे माळेंत ऑस्ट्रेलिया पंगडान 2-0 अशी निर्णायक आघाडी घेतली. हे टॅस्टी वेळार ऑस्ट्रेलियेच्या खेळगड्यांक दुखापतीन बेजार केलो. तरी पूण दक्षीण आफ्रिकेक ताका आव्हान दिवपाक जमलें ना.
पयल्या डावांत पांच विकेटी घेवपी कॅमेरून ग्रिनान हात दुखून लेगीत अर्द शेंकडो नोंदयलो. पूण, ताका दुसऱ्या डावांत बॉलींग घालपाक जमली ना. तिसरी टॅस्टूय ताका चुकतली. मिचेल स्टार्काक बोटाची दुखापत जाली. दुसऱ्या डावांत बॉलींग करतना ताच्या बोटांतल्यान रगत व्हांवतालें. तरी आसतना ताणें बॉलींग चालूच दवरली.
हाचे खेरीत डॅव्हीड वॉर्नर 200 धांवड्यो केल्या उपरांत जखमी जालो. तरी आसतना तो मॅचीच्या तिसऱ्या दिसा बॅटिंगेक आयलो.
दक्षीण आफ्रिकेचो दुसरो डाव फकत 204चेर सोंपलो. नॅथन लायनान तीन जाल्यार स्कॉट बोलंडान दोन विकेटी घेतल्यो. दक्षीण आफ्रिके वतीन टेंबा बावुमान सगल्यांत चड 65 धांवड्यो केल्यो. 100वे टॅस्टींत 200ची खेळी करपी वॉर्नराची मॅन ऑफ द मॅच पुरस्कारा खातीर निवड जाली.
मॅची विशीं सांगचें जाल्यार ऑस्ट्रेलियेन टॉस जिखून दक्षीण आफ्रिकेक बॅटींग करपाचें आमंत्रण दिल्लें. आफ्रिकेचो डाव 189चेर सोंपलो. ताका प्रत्त्युत्तर दितना ऑस्ट्रेलियेन 8 विकेटी वगडावन 575 धांवड्यो केल्यो. वॉर्नरा खेरीत अॅलेक्स कॅरीन 111 धांवड्यांचें योगदान दिलें. स्मिथान 85, ग्रिनान नाबाद 51 केल्यो. ट्रॅव्हीस हेडान जलद रितीन 51 धांवड्यो केल्यो.
मॅच चवथ्याच दिसा सोंपली. माळेतली निमाणी मॅच 3 जानेवारी सावन सिडनी क्रिकेट मैदानाचेर सुरू जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.