ऑस्ट्रेलियेचें सेगीत दुसरें जैत

भांगरभूंय | प्रतिनिधी

बायलांचे संवसारीक टी-20 क्रिकेट सर्तींत सध्याचो वस्ताद ऑस्ट्रेलिया पंगडान आपल्या जैताचो क्रम कायम राखतना काल सेगीत दुसऱ्या जैताची नोंद केली. अ गटांतले मॅचींत ताणें न्युझिलॅण्ड पंगडाक 60 धांवड्यांनी हारयलो.

टॉस जिखून पयलीं बॅटींग करपी ऑस्ट्रेलिया पंगडान निर्धारीत 20 ओव्हरींनी 8 विकेटी व्हगडावन 148 धांवड्यो केल्यो आनी उपरांत न्युझिलॅण्डाचो डाव 19.2 ओव्हरींनी फकत 88 धांवड्यांचेर सोंपयलो.

मोखीचो फाटलाव करपी न्युझिलॅण्डाक सात धांवड्यांचेर पयलो धपको बसलो. ते उपरांत एमेलिया कर वांगडा मेळून सुजी बेट्सान डाव मुखार व्हेलो. पूण, 54 धांवड्यांचेर सुजी बेट्स बाद जाली. ते उपरांत न्युझिलॅण्डान आनीक तीन विकेटी व्हगडायल्यो. 60 धांवड्यांचेर ताचे 6 बॅटर बाद जाले. ऑस्ट्रेलियेन अशे तरेन मॅचींत पुनरागमन केलें.

ते पयलीं बेन मुनी (40), एलीस पेरी (30) आनी मुखेली एलिसा हिली (26) हांच्या यत्नांक लागून ऑस्ट्रेलियान 148 धांवड्यां मेरेन मजल मारली. ऑस्ट्रेलिया पंगडान डावाची सुरवात बरी केल्ली. मुनी आनी हिली हांणी पयले विकेटी खातीर 41 धांवड्यांची भागिदारी केली. सवे ओव्हरींत रोजमेरी मेयरान हिलीक बाद करून ऑस्ट्रेलियेक पयलो धपको दिलो. ते उपरांत आयिल्ले एलीस पेरीन मुनी वांगडा मेळून दुसरे विकेटी खातीर 45 धांवड्यांची भागिदारी केली. 12वे ओव्हरींत एमेलिया केरान मुनीक बाद केली. 14वे ओव्हरींत केर हिणें एलीस पेरीक बोल्ड केली. 17वे ओव्हरींत फोएबे चिलफिल्ड (18) हिका हॉलिडे हिणें बाद केली. ते उपरांत न्युझिलॅण्डाच्या बॉलरांनी ऑस्ट्रेलियेचेर आपलो शेक दवरलो. ग्रेस हॅरीस (0), एश्ली गार्डनर (6), जॉर्जिया वेयरहम (4), एेनाबेल सदरलॅण्ड (2) हांकां व्हड खेळी करपाक जमली ना.