भांगरभूंय | प्रतिनिधी
28 टक्क्यांनी वाड जावनूय अनुदानीत शाळां परस फाटींच
भांगरभूंय । पिनाक कल्लोळी
पणजीः एका वर्सांत गोंयांतल्या सरकारी शाळांतली इंटरनॅट सुविधेंत 28.2 टक्क्यांनी वाड जाल्या. 2020-21त गोंयांतल्या 8.5 टक्के सरकारी शाळांनी इंटरनॅटाची सुविधा आशिल्ली. 2021-22त 36.7 टक्के सरकारी शाळांनी इंटरनॅटाची सुविधा उपलब्ध जाल्या. तरी लेगीत हे बाबतींत अनुदानीत आनी खाजगी विनाअनुदानीत शाळांनी सरकारी शाळांक फाटीं उडयल्यात.
2021-22त गोंयांतल्या 82.4 टक्के अनुदानीक शाळांनी जाल्यार 87.1 टक्के विनाअनुदानीत खाजगी शाळांनी इंटरनॅटाची सुविधा उपलब्ध आसा. हेर विवीध तरेच्या वेवस्थापना वरवीं चलयतात त्या 58.2 टक्के शाळांनी इंटरनॅट सुविधा आसा. पुराय देशांतल्या शाळांनी इंटरनॅट आसपाची सरासरी 24.2 टक्के आशिल्ली. गोंयचे तुळेंत 2021-22त दिल्ली, चंदीगड, पुद्दूचेरी आनी पंजाबांतल्या सगळ्या म्हणल्यार 100 टक्के सरकारी शाळांनी इंटरनॅट सुविधा उपलब्ध आसा.
2021-22त गोंयांत 1510 शाळा आशिल्ल्यो. तातूंतल्यो 814 सरकारी, 557 अनुदानीत, 139 खाजगी विनाअनुदानीत जाल्यार हेर वेवस्थापना वरवीं चलपी 1162 शाळांचो आस्पाव आशिल्लो. त्या वर्सा 3 लाख 4 हजार 982 विद्यार्थ्यांनी ह्या विवीध शाळांनी प्रवेश घेतिल्लो. वट्ट 13 हजार 836 शिक्षक आशिल्ले. दर 22 विद्यार्थ्यां फाटल्यान एक शिक्षक अशें तें प्रमाण आशिल्लें.
चलतात फक्त 20 टक्के कंप्युटर
चालू स्थितींतल्या कंप्युटरां विशीं मात गोंयांतल्यो सरकारी शाळा फाटीं आसात. फक्त 20.3 टक्के सरकारी शाळेंतले कंप्युटर चलतात. 94.1 टक्के अनुदानीक आनी 95.7 टक्के खाजगी शाळेंतले कंप्युटर चालू स्थितींत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
