एका दिसांत वन हक्क दाव्यांचे हजार अर्ज निकालात

भांगरभूंय | प्रतिनिधी

स म्हालांनी विशेश शिबिरां; प्रशासनान बांदलां पेंगट

भांगरभूंय । प्रतिनिधी

पणजी : गोंयांतल्या उरिल्ले वनहक्क दावे येता त्या 19 डिसेंबरा मेरेन निकालात काडपाची हमी मुख्यमंत्री डॉ. प्रमोद सावंत हांणी कांय दिसां आदींच दिल्ली. ते उपरांत प्रशासनान तत्काळ विवीध म्हालांनी विशेश शिबिरां घेवपाक सुरवात केल्या. शेनवारा उत्तर गोंयांतल्या सत्तरी आनी दक्षीण गोंयांतल्या फोंडें, धारबांदोडें, सांगें, केपें आनी काणकोण अश्या स म्हालांनी विशेश शिबिरां घेवन सुमार एक हजार अर्ज निकालांत काडले आनी ते विशींची फुडली प्रक्रिया सुरू केल्या. वनहक्क दाव्यां खातीर आतां मेरेन सुमार 10.500 परस अदीक अर्ज सरकारा कडेन आयल्यात.

वनहक्क दाव्यांचो विशय गोंयांत फाटल्या कितल्याश्याच वर्सां सावन गाजता. वनहक्क कायदो 2006 अंमलात आयले उपरांत 2012 सावन अर्ज घेवपाक सुरवाक जाली. 2019 मेरेन फक्त सुमार 100 अर्ज निकालात काडिल्ले. जाल्यार जुलय 2021 मेरेन फक्त 46 जाणांक सनद दिल्ली. डॉ. प्रमोद सावंत हांणी मुख्यमंत्रीपदाचीं सुत्रां हातांत घेतले उपरांत चडांत चड वनहक्क दावे निकालात काडचे खातीर तांणी यत्न केले. तेच नदरेन कांय दिसां आदीं तांणी जिल्होधिकारी, महसूल, आदिवासी कल्याण सयत हेर संबंदीत खात्यांच्या वरिश्ठ अधिकाऱ्यां कडेन बसका घेवन वनहक्क दावे निकालात काडपाक गती दिवपाचे निर्देश दिल्ले. ते खातीर दर शेनवारा विवीध म्हालांनी विशेश शिबिरांचें आयोजन करून उरिल्ल्या अर्जां विशींची फुडली प्रक्रिया सुरू करपाक लेगीत तांणी सांगिल्लें. ते प्रमाण शेनवारा सत्तरी, फोंडें, केपें, धारबांदोडें, सांगें आनी काणकोण ह्या स म्हालांनी विशेश शिबिरांचें आयोजन केल्लें.

सत्तरी म्हालांत 1579 अर्ज उरिल्ले. तातूंतल्या 553 अर्जांक हे आदीं मंजुरी मेळ्ळ्या. शेनवारा 110 अर्जा संबंदांतली प्रक्रिया सुरू केल्या. फोंडें उपजिल्होधिकारी कार्यालयांत जाल्ल्या शिबिरांत 130 अर्जां वयलीं प्रक्रिया सुरू केल्या. धारबांदोडें म्हालांत जाल्ल्या शिबिरांत 100 अर्जां वयली प्रक्रिया सुरू केल्या. धारबांदोड्यां हे आदीं 900 जाणांक सनद दिल्या. ते उपरांत 800 अर्ज उरिल्ले. 100 अर्जां वयली प्रक्रिया सुरू जाल्ल्यान सध्याचे स्थितींत थंय 700 अर्ज उरल्यात. केपें म्हालांतल्या शिबिरांत 97 अर्जां वयली प्रक्रिया फुडें सुरू केल्या. काणकोण म्हालांत सुमार 410 अर्जां वयली फुडली प्रक्रिया सुरू केल्या. जाल्यार सांग्यार 52 अर्ज निकालांत काडल्यात.

‘प्रॉजेक्ट अधिकार’ खाला मोहीम

वनहक्क दावे निकालात काडपाची प्रक्रिया सरकाराच्या ‘प्रॉजेक्ट अधिकार’ ह्या उपक्रमाचो भाग आसा. डिसेंबर 2025 आदीं पात्र अर्जदारांचे दावे निकालात काडपाची मोख सरकारान दवरल्या. उरिल्ल्या प्रकरणां कातीर गरजेचीं कागदपत्रां 15 दिसांनी सादर करपाचो उलो उपजिल्होधिकाऱ्यान शिबिरांत मारलो. फुडले प्रक्रिये खातीर अर्जांची पयलीं छाननी जातली. तातूंतले उणाव पयस करचे खातीर अर्जदारां कडल्यान गरजेचीं कागदपत्रां घेतले. ते उपरांत अर्जांक ग्रामसभांची मंजुरी मेळ्ळे उपरांत ते उपजिल्होधिकारी पांवड्या वयल्यान जिल्होधिकारी पांवड्यार निमाणे कार्यवाही खातीर वतले.

21 जूनाक विशेश ग्रामसभा

21 जूनाक सनदी कडेन संबंदीत प्रकरणां तशेंच उरिल्ल्या दाव्यां विशीं विशेश ग्रामसभा आयोजीत करतले. ते आदीं 18 जूनाक उपजिल्होधिकारी उरिल्लीं प्रकरणां निकालात काडचे खातीर बसका घेतले.