भांगरभूंय | प्रतिनिधी
विजय सरदेसायः 2012 उपरांतचे विरोधी पक्ष बिनकामाचे
भांगरभूंय I प्रतिनिधी
पणजी : लोकसभा वेंचणुकेंत काँग्रेसीन दक्षीण गोंयांतलो उमेदवार बदल्ल्यार ही सुवात निश्चीत परतून काँग्रेसीकूच मेळटली. काँग्रेसच्या दक्षीण गोंयांतल्या कांय आमदारांनी भाजपांत प्रवेश केल्लो आसलो, तरी ताचो फटको काँग्रेसीक लोकसभा वेंचणुकेंत बसचो ना, अशें गोवा फॉरवर्डाचे अध्यक्ष तशेंच अामदार विजय सरदेसाय हांणी सोमारा स्पश्ट केले.
प्रुडंट मिडया खबरां चॅनला वयले ‘हेडआॅन’ कार्यावळींत ते उलयताले. नावेली मतदारसंघ वगळून साश्ट म्हालांत भाजपाक हेर खंयूच येस मेळूंक ना. ताका लागून दक्षीण गोंयांतल्या कांय आमदारांच्या भाजप प्रवेशाक लागून लोकसभा वेंचणुकेंत भाजप उमेदवार वेंचून येवप अशक्य. काँग्रेसीन लोकां मदीं वावुरपी, लोकांची कामां करपी उमेदवार दिल्यार निश्चीत दक्षीण गोंयांत काँग्रेस उमेदवाराक फाटले खेपे परस चड मतां मेळटलीं, अशें विजय सरदेसाय हांणी म्हणलें.
2012 पसून विरोधी पक्ष फुडारीपदार आशिल्ल्या काँग्रेस फुडाऱ्यांनी कसलीच कामां करूंक ना. लोकांचो आवाज विधानसभेंत पावोवंक ना. दिगंबर कामत, मायकल लाेबो हे फक्त नांवा पुरतेच विरोधी पक्ष फुडारी आशिल्ले. सेटींग करूनच हे फुडारी विरोधी पक्ष फुडारीपदा मेरेन पाविल्ले. तांणी केन्नाच सरकाराच्या चुकीच्या निर्णया आड आवाज काडूंक ना. मायकल लोबो जाल्यार सरकाराच्या हातांतले बावले आशिल्ले, अशी टिका सरदेसाय हांणी केली.
मजगतीं, प्रादेशीक पक्ष गोंयचो निर्णय घेतात. ताका लागून प्रादेशीक पक्षां वयलो लोकांचो विस्वास अजुनूय कायम आसा. हाचे मुखारूच तो उरतलो, अशें सरदेसाय हांणी नमूद केले.
पक्षाच्या धोरणाक लागून भाजपा निश्ठावान दुखावले
सध्याचो भाजपा पयलीचो काँग्रेस जावंक ना. भोवतेक मंत्री, आमदार काँग्रेसीचेच आसात. लोकसभा वेंचणुके खातीर आनीक आठ आमदारांक भाजपांत प्रवेश दिल्ल्यान निश्ठावान कार्यकर्ते दुखावल्यात. ताचो फटको भाजपाक बसपाक शकता, अशें सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
