भांगरभूंय | प्रतिनिधी
गोंयांत आतां रोखडोच दुसरो विमानतळ सुरू जातलो. लँडींग चांचणी येसस्वी जाल्यान मोपा विमानतळाचें सपन साकार जाल्ल्यान जमा आसा. पेडणे म्हाला खातीर न्हय तर पुराय गोंयां खातीर हो विमानतळ वरदान थारतलो. हे खातीर सगळ्यांनी येवकार दिवपाची गरज आसा.
एकविसावो शेंकडो सुरू जालो तेन्ना सावन मोपा विमानतळाची चर्चा सुरू आसा. विमानतळाचो विशय आयलो काय, दक्षीण गोंयांतल्या राजकी फुडाऱ्यां कडल्यान विमानतळाक विरोध जातालो. सगळ्यांत मोठो विरोध जातालो तो चर्चिला कडल्यान. तशेंच कावंसिल फोर सोशियल जस्टीस अॅन्ड पीस (सीएसजेपी) हे संस्थे कडल्यानूय. विरोधा खातीर तरेकवार कारणांची वळेरी ते दिताले. गोंय हे ल्हान राज्य. लोकसंख्या मर्यादीत. हांगा दुसऱ्या विमानतळाची गरज ना, अशें एक कारण विरोधक दिताले. मोपा विमानतळ जालो जाल्यार दाबोळी बंद जातलो. तो बंद जालो, जाल्यार दक्षीण गोयांतल्या हॉटेल वेवसायाचेर परिणाम जातलो. केळशी, बाणावली, उतोड्डा आनी हेर दर्यादेग वाठारांत बरीच नकेत्री हॉटेलां आसा. दाबोळी विमानतळाक लागून पर्यटक हाॅटेलांनी वतात. थंय परिशदो जातात. दाबोळी बंद जालो जाल्यार हॉटेल वेवसाया वांगडा टॅक्सी वेवसायाक सुद्धा फटको बसतलो. अशी तरेकवार कारणां दिवन मोपा विमानतळाक विरोध जातालो.
उत्तर गोंयचे फुडारी मोपा विमानतळाचे समर्थन करताले जाल्यार दक्षीण गोंंयचे चडशे फुडारी विरोध करताले. हाका लागून मोपा विमानतळा विशीं ‘उत्तर आड दक्षीण’ अशी स्थिती जाल्ली. मोपा विमानतळा विशीं कांय संस्थांनी अहवाल तयार केल्ले. ताचो आदार विरोधक घेताले. आदले खासदार तशेच आमदार चर्चिल आलेमाव हांचो उघडपणान विरोध आशिल्लो. दक्षीणेंतल्या काँग्रेस फुडाऱ्यांचो सुद्धा विरोध आशिल्लो. हाका लागून काँग्रेस पक्ष सुद्धा बरोच तेप मोपा विमानतळा विशीं ठोस भुमिका घेनाशिल्लो. 2005 ते 2012 मेरेन राज्यांत काँग्रेसीचे सरकार आशिल्लें. केंद्रात सुद्धा काँग्रेसीचें सरकार आशिल्लें. हाका लागून मोपा विमानतळा विशीं कसलोच निर्णय जालो ना. मोपा विमानतळ जातलो काय ना, अशें दुबावाचें वातावरण आशिल्लें. विमानतळाच्या विरोधात आनी विमानतळाच्या समर्थनार्थ आंदोलनां मात जातालीं. हाका लागून निर्णय घेवप खंयच्याय सरकारा खातीर आडखळीचो थारतालें.
दक्षीण गोंयचो विचार केलो, जाल्यार सगळ्यांत खर विरोध चर्चिल हांचो आसलो. मोपा विमानतळाच्या मुद्याचेर 2007 वर्सा तांणी काँग्रेस सोडून ‘सेव्ह गोवा फ्रंट’ हो पक्ष स्थापन केलो. सगळ्याक तांणी मोपा विमानतळाच्या विरोधात जाहीर सभा घेतल्यो. चर्चिल हांचे सयत सीएसजेपी संस्था सुद्धा मोपाचो विरोध करताली. शेतजमनीचेर विमानतळ उबारपाक हरकत घेवपा सयत दुसऱ्या विमानतळाची गरज ना, असो तांचो दावो आशिल्लो. विजय सरदेसाय हे 2012 वर्सा अपक्ष आमदार आशिल्ले. तांचो सुद्धा मोपाक विरोध आशिल्लो. 2012 चे वेंचणुके उपरांत राज्यांत मनोहर पर्रीकार हांच्या फुडारपणा खाला भाजपाचें सरकार आयलें. लोकसभा वेंचणुके उपरांत केंद्रांतूय भाजपाचें सरकार आयलें आनी नरेंद्र मोदी प्रधानमंत्री जाले. केंद्रात आनी राज्यात भाजपाचें सरकार आयले उपरांत मोपा विमानतळाच्या कामाक गती आयली.
2035 मेरेन गोंयांत विमान प्रवाशांचो आकडो 10 दशलक्ष इतलो जातलो, असो अहवाल ‘आयकाव’ हे संस्थेन दिलो. हाका लागून सरकारान मोपाचो प्रस्ताव फुडें व्हरपाचो निर्णय घेतलो. मार्च 2000 वर्सा केंद्रान मोपा विमानतळाक तत्वत: मान्यताय दिल्ली. हाचे उपरांत चौदा वर्सांनी म्हणजे ऑक्टोबर 2014 वर्सा सरकारान आरएफक्यू (रिक्वेस्ट फॉर कोटेशन) जारी केले. जीएमआर, जीव्हीके, विमानतळ प्राधिकरण, एसेल इन्फ्रा आनी वोलुप्टास या पाच कंपन्यांनी आरएफक्यू सादर केल्ले. फुडलेच वर्सा केंद्रान विमानतळाक पर्यावरणी दाखलो दिलो. या दाखल्याक सुद्धा हरीत लवादा मुखार आव्हान दिल्लें. हे भायर जमीन संपादनाचोय प्रस्न आशिल्लो. जमीन संपादना उपरांत लुकसाण भरपाये विशीं वाद आशिल्लो. जीएमआर कंपनीच्या इत्सा प्रस्तावाक मान्यताय मेळ्ळे उपरांत विमानतळा खातीर कंपनी निश्चित जाली.
8 नोव्हेंबर 2016 हे दिसा विमानतळ उबारपा खातीर जीएमआर कंपनीन गोंय सरकारा कडेन कबलात केली. हाचे उपरांत मोपा विमानतळाचें काम मार्गाक लागलें. मदल्या काळात दर खेपो मोपा विमानतळा उपरांत दाबोळी उरतलो काय? असो प्रस्न उपस्थित जातालो. दर विधानसभा अधिवेशनात तर हो प्रस्न आसतालोच. सर्गेस्त मनोहर पर्रीकार आनी ताचे उपरांत मुख्यमंत्री ह्या नात्यान प्रो. लक्ष्मीकांत पार्सेकार हांणी मोपा उरतलोच, अशें जाहीर केल्लें. मोपा विमानतळाचो वावर सुरू जाले उपरांत दाबोळी विमानतळांत सुद्धा सुदारणा जाली. गाडयांच्या पार्किंगां खातीर जाग्याची वेवस्था जाली. थळावे आमदार, मंत्री मॉविन गुदिन्हो हे मात मोपा विमानतळाचे समर्थन करताले. काँग्रेसीत आसताना सुद्धा तांणी मोपा विमानतळाक तेंको दिल्लो.
विमानतळाचो पयलो टप्पो पुराय जावपाक स वर्सां लागलीं. लँडींग चांचणी येसस्वी जाल्ल्यान आतां उक्तावणाचो मार्ग मेकळो जाला. गोंय हें महत्वाचें पर्यटन थळ. आतां गोयांत चित्रपट महोत्सव जाता. हे भायर उद्देगिक तशेच आयटी विशयक परिशदो जातात. सेलीब्रेटींचीं लग्नांय गोंयच्या हॉटेलांनी जाल्या. खण उद्येग बंद आसा. हेर व्हड उद्येग सुद्धा सुरू जावंक ना. रोजगार तशेच अर्थवेवस्थे खातीर पर्यटन हो सध्या आदार आसा. दाबोळी विमानतळ हो नौदलाचो विमानतळ. तशेंच दाबोळी विमानतळाचो विस्तार तशेंच प्रवाशांचो भार सोसपाचे तांकीर मर्यादा आसात. विमान प्रवास ही आता लक्झरी उरुंक ना. मध्यमवर्गीयांक सुद्धा आपत्कालीन स्थितींत विमानान प्रवास करचो पडटा.
मोपा विमानतळाक लागून विमान येरादारीचें प्रमाण वाडटलें. विदेशी पर्यटकांचो आंकडो वाडटलो. पर्यटना खातीर मुळाव्यो सुविधा उबारपाचो वावर सुरू आसा. तरेकवार येवजणे खाला पर्यटन थळांचें सुद्धा नुतनीकरण जातलें. गोंयच्यो दर्यादेगो पुराय संवसारात फामाद आसा. राज्यांतली देवळां तशेंच चर्चीचें सुद्धा खाशेलेपण आसा. अंत्रुज म्हालातल्या देवळां मदीं विदेशी पर्यटकांक आकर्शित करपाची तांक आसा. मोपा विमानतळाचो पर्यटन तशेच उद्येगां खातीर लाव जातलो. मोपा विमानतळ पेडणे म्हालाच्या उद्देगिक तशेच अर्थिक उदरगतीची बुन्याद थारतलो, हातूंत दुबाव ना.
गणेश जावडेकार
9860610762
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
