भांगरभूंय | प्रतिनिधी
-उदका पुरवण मंत्रीः आनीक 350 एमएलडी उदकाची गरज
पणजी : साळ गांवांतलो उदक पंपींग करपी प्रकल्प पुराय जाले उपरांत उत्तर गोंयांतल्या उदकाची समस्या पयस जातली. हें काम 2024 मेरेन पुराय जातले, अशें उदका पुरवण मंत्री सुभाष शिरोडकार हांणी सांगलें. तिळारीचें उदक बिरेस्तारा गोंयांत पावले. हाका लागून पर्वरी तशेंच हेर वाठारांतल्या उदकाचो उणाव पयस जाला.
कानालांच्या दुरुस्तेक लागून देड म्हयनो तिळारीचें उदक बंद आशिल्लें. हाका लागून पर्वरी, म्हापशें वाठारात उदकाचो उणाव जाणवतालो. बार्देश तशेंच दिवचल म्हालाक लेगीत मर्यादीत प्रमाणांत उदकाची पुरवण जाताली. कानांलांच्या दुरुस्तीचें काम पुराय जाल्ले, पूण तिळारी धरणाची गेट उक्तीं करपाक तंत्रीक अडचण आयिल्ल्यान उदक पावपाक कळाव जालो. तिळारीचें उदक पर्वरी पंपींग स्टेशनात बिरेस्तारा पावले आनी लोकांनी सुटकेचो स्वास घेतलो. तिळारीचें उदक 13 नोव्हेंबराक बंद जाल्लें.
उत्तर गोंयाक आनीक 350 एमएलडी उदकाची गरज आसा. ही गरज पुराय करपाचे यत्न सुरू आसात. साळांत पंपींग स्टेशनाचें काम सुरू आसा. पांच पंप बसोवन साळ न्हंयेंतलें उदक आमठाणें धरणांत सोडपाची येवजण आसा. हें काम 2024 मेरेन पुराय जातले. आमठाणें सावन जे उदक पर्वरी येता, ते फावोशे थारना. आमठाणें धरणांतल्या उदकाची तांक वाडोवपाची येवजण आसा. तशेंच चांदेल, पिळर्ण आनी पर्वरी प्रकल्पांची तांक वाडयतले. ह्या तिनूय प्रकल्पांची तांक वाडले उपरांत त्या, त्या वाठारांत अतिरिक्त उदकाची पुरवण करप शक्य जातले. वट्ट आनीक 350 एमएलडी उदकाची वेवस्था करपाची तजवीज आसा. हाचे खातीर 250 कोटींचो खर्च जातलो, अशें उदका पुरवण खात्याचे मंत्री सुभाष शिरोडकार हांणी सांगलें.
गोंयचे वटेन 9 किमि. कानालांची दुरूस्ती
तिळारीचें उदक बंद आशिल्ले तेन्ना गोंयान 9 किमि. कानालांची दुरूस्ती केल्या. उदकाची गळटी जावपाक जाय ना, म्हूण लायनींग वर्क पुराय केलां. महाराष्ट्रान आपले वटेन 4 किमि. कानालांची दुरुस्ती केल्या. कानालांच्या दुरुस्ती खातीर उदक बंद करपाची विनवणी महाराष्ट्रान गोंयाक केल्ली. ते प्रमाण उदक बंद दवरिल्लें. आतां मात्शें काम उरलां. ह्या कामा खातीर उदक बंद करचे पडचें ना.
गेटी उक्तीं करपाक आयिल्ली तंत्रीक अडचण
गेट उक्तीं करून 22 डिसेंबराक उदक सोडपाचे आशिल्ले, पूण बरेच दीस गेट बंद उरिल्ल्यान ती घट बसली. गेट ताकद लावन उक्तीं केली जाल्यार ती मोडपाची भिरांत आशिल्ली. गेट उक्तीं करपा खातीर पुण्याच्या तंत्रज्ञांची मजत घेतली. पुण्याच्या 20 तंत्रज्ञांनी कुशळटाय वापरून गेट उक्ती केली. मंगळारा गेट उक्तीं करून गोंयचे वटेन उदक सोडलें. बिरेस्तारा उदक पर्वरी पावले, अशी म्हायती उदका पुरवण खात्याचे मंत्री सुभाष शिरोडकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
