भांगरभूंय | प्रतिनिधी
भांगरभूंय प्रतिनिधी
पणजी: उत्तर गोंयचे उमेदवार श्रीपाद नायक हांणी अॅड. रमाकांत खलप हांकां हारोवन लोकसभा वेंचणुकेंत 6वे खेपे जैत मेळयलां. तांणी आदले खासदार एदुआर्द फालेरो हांचो पांच टर्माचो विक्रम लेगीत मोडला. श्रीपाद नायक 2024 चे वेंचणुकेंत सर्वाधीक मताधिक्क्यान जिखल्यात. हाचे पयलीं तांणी 2014 त काँग्रेसचे उमेदवार रवी नायक हांचे आड 1 लाख 5 हजार मताधिक्क्य मेळयिल्ले. हे खेपे तांकां 1 लाख 16 हजार 015 चे मताधिक्क्य मेळ्ळा.
हाचे पयलीं दक्षीण गोंयांत एदुआर्द फालेरो हांणी पांच लोकसभा वेंचणुको जिखिल्ल्यो. तांणी 1977, 1980, 1984, 1989 आनी 1991 तल्यो सार्वत्रीक वेंचणुको जिखिल्ल्यो. श्रापाद नायक हांणी 1999, 2004, 2009, 2014, 2019 आनी 2024 त सेगीत जैत मेळयला.
अंदूं श्रीपाद नायक आनी आदले केंद्रीय मंत्री अॅड. रमाकांत खलप वट्ट 25 वर्सां उपरांत लोकसभा वेंचणुकेच्या रिंगणांत परतून एकामेकां आयिल्ले. श्रीपाद नायक हांणी 1999 त भाजपा वतीन पयले लोकसभा वेंचणुकेंत रमाकांत खलप हांका हारयिल्ले.
1999 पसून आतां मेरेन जाल्ल्या सेगीत 6 लोकसभा वेंचणुकांत श्रीपाद नायक हांणी उत्तर गोंयचो गड जिखला. नायक हांणी 2004 त काँग्रेसच्या विल्फ्रेड डिसोझा हांकां 56,213 मतांनी, 2014 त रवी नायक हांकां सुमार 1.5 लाखांनी, जाल्यार फाटले वेंचणुकेंत गिरीश चोडणकार हांकां 80,247 मतांनी हारयिल्ले.
ह्या काळांत नायक हांकां फक्त 2009 तले एकेच वेंचणुकेंत खर लडत दिवची पडिल्ली. हे वेंचणुकेंत उत्तर गोंयांतल्यान ते फक्त 6,253 मतांनी जैतिवंत जाल्ले. काँग्रेस उमेदवार जितेंद्र देशप्रभू हांणी तांचे अाड खर लडत दिल्ली. तरी लेगीत नायक हांणी जैताचो रथ कायम दवरिल्लो. ह्या काळांत केंद्रीय मंत्री म्हूण जायत्या खात्यांची जापसालदारकी तांणी यसस्वी रितीन सांबाळ्ळी.
——————-
कोट
———-
उत्तर गोंयांतल्या सगल्या मतदारांचे हांव उपकार मानता. तांच्या आशिर्वादान म्हाका डबल टॅट्ट्रीक करप शक्य जाले. लोकांची, मतदारसंघाची उदरगत हेच म्हजें ध्येय. आपूण पक्षा कडेन कसलेच मंत्रीपद मागूंक ना. पक्ष दितलो ती जापसालदारकी घेवपाक तयार आसा.
– श्रीपाद नायक, विजयी उमेदवार.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
