भांगरभूंय | प्रतिनिधी
-30 डिसेंबर मेरेन उदका पुरवण सुरळीत जावयेः बांदकाम खातें
पणजी : तिळारी कानालाचें काम 22 डिसेंबराक पुराय जालें. पूण उपरांत गोंयाक अजून उदकाची पुरवण जावंक ना. ताका लागून पर्वरेंतलो उदकाशुद्धीकरण प्रकल्प बंद आशिल्ल्यान उत्तर गोंयांत उदकाची समस्या निर्माण जाल्या. तिळारींतल्यान बेगीन उदक गोंयांत आयल्यार 30 डिसेंबर मेरेन उदका पुरवण सुरळीत जातली, अशी म्हायती भौशीक बांदकाम खात्याच्या (पीडब्ल्यूडी) सुत्रांनी आमच्या प्रतिनिधी कडेन उलयतना दिली.
तिळारी धरण बांदून 30 वर्सां परस चड काळ गेल्ल्यान महाराष्ट्र सरकारान ह्या धरणांतल्यान महाराष्ट्र तशेंच गोंयाक उदका पुरवण करपी कानालाच्या डागडुजीचें काम हातांत घेतलां. गोंय सरकाराक दिल्ले हमी प्रमाण महाराष्ट्र सरकारान तिळारी कानालाच्या डागडुजीचें काम 22 डिसेंबराक पुराय केल्लें. ताका लागून 23 डिसेंबराच्यान गोंयाक उदका पुरवण जातली आनी पर्वरेंतलो प्रकल्प पुराय जावन उत्तर गोंयाक फुडल्या दोन दिसांत सुरळीत उदक मेळटले, अशें उदकास्रोत मंत्री सुभाष शिरोडकार हांणी सांगलें. पूण 22 डिसेंबराक काम पुराय जावनूय अजून तिळारींतल्यान गोंयांत उदक येवंक ना. ताका लागून पर्वरेंतलो उदका प्रकल्प सुरू जावंक नाशिल्ल्यान उत्तर गोंयांतल्या लोकां मुखार उदकाची समस्या निर्माण जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
