भांगरभूंय | प्रतिनिधी
राष्ट्रीय शिक्षण धोरणांत गोंय एका पांवड्यार मुखार
पणजी : येता त्या शिक्षणीक वर्सा सावन उंचेल्या शिक्षणांत राष्ट्रीय शिक्षण धोरणाची कारवाय सुरू जातली. फावंडेशन कोर्सा सावन कारवाय जातली, अशें मुख्यमंत्री डॉ. प्रमोद सावंत हांणी सांगलें.
नव्या राष्ट्रीय शिक्षण धोरणाचे कारवायेंत गोंय एक पांवडो मुखार आसतलें असो विस्वास तांणी उक्तायलो.
राष्ट्रीय शिक्षण धोरणाच्या दर्जाचेर आधारीत कार्यशाळेच्या उक्तावणाक मुख्यमंत्री उलयताले. ह्या वेळार शिक्षण संचालक शैलेश जिंगडे, उच्च शिक्षण संचालक प्रसाद लोलयेंकार, एससीईआरटीचे संचालक डॉ. नागराज होन्नेकरी आनी हेर अधिकारी हाजीर आशिल्ले. हे कार्यशाळेंत 20 राज्यांचे शिक्षण अधिकारी वांटेकार जाल्यात. दोन दीस ही कार्यशाळा चलतली. शिक्षण धोरणाच्या कारवाये खातीर अशे तरेचे परिसंवाद वा कार्यशाळा पुरक थारतल्यो अशें मुख्यमंत्र्यांनी सांगलें.
दर्जेदार शिक्षण हो नव्या शिक्षणीक धोरणाचो हेत आसा. गोंयान शिक्षण धोरणाची कारवाय सुरू केल्या. नव्या शिक्षण धोरणाच्या येसस्वी कारवाये खातीर शिक्षकांक प्रशिक्षण दिवपाची गरज आसा. शिक्षकांच्या प्रशिक्षणाची प्रक्रिया सुरू जाल्या. राष्ट्रीय पांवड्यार शिक्षण धोरणाच्या कारवायेचेर परिसंवाद जाल्यात. ह्या परिसंवादांत वांटेकार जावपाची संद म्हाका मेळ्ळी. देश सध्या आझादी का अमृत महोत्सव मनयता. आझादी का अमृत महोत्सवांत आत्मनिर्भर भारताचें सपन प्रधानमंत्री नरेंद्र मोदी हांणी पळयलां. हें सपन साकार करपांत शिक्षणाचो मोटो वांटो थारतलो. पुराय देशा बरोबर फुडें वतलो, जाल्यार सर्वसमावेशक शिक्षणीक धोरणाची गरज आसा. वैजकी, अभियांत्रिकी तशेंच हेर अभ्यासक्रमांत नव्या शिक्षण धोरणाची कारवाय जातली. हाची प्रक्रिया सुरू जाल्या. वैजकी तशेंच अभियांत्रिकी शिक्षण आवयभाशेंतल्यान दिवपा खातीर पुस्तकांच्या अणकाराचो वावर सुरू जाला.
प्रधानमंत्री नरेंद्र मोदी हांणी सत्तेर आयले उपरांत 2014 वर्सा कुशळटाय मंत्रालय सुरू केलें. नोकऱ्यो दिवपाची तांक आशिल्ले मनीसबळ तयार करपी शिक्षण धोरण जाय. देशांत सगली कडेन कुशळटाय अभ्यासक्रम सुरू जाला. प्रधानमंत्री नरेंद्र मोदी हांणी हाचे खातीर स्कील इंडिया मोहीम सुरू केली. सुशिक्षीत तशेंच अशिक्षीत तरणाट्यांक कुशळटाय शिक्षण दिवपाची प्रक्रिया सुरू जाल्या. आतां तांणी फीट इंडिया मोहीम सुरू केल्या. हाचे खातीर शिक्षकांक प्रशिक्षीत जावपाची गरज आसा. विद्यालयीन शिक्षण आनी शिक्षकांचे शिक्षण हातूंत फरक आसा. नव्या शिक्षण धोरणाचे कारवाये खातीर शिक्षकांक प्रशिक्षण दिवपाची गरज आसा, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
