भांगरभूंय | प्रतिनिधी
इंडियन सुपर लिगेंत (आयएसएल) काल इस्ट बंगालान बळिश्ट बंगळुरू एफसीक 2-1 असो हारयलो. ह्या जैतान इस्ट बंगालान प्ले ऑफांत सुवात मेळोवपाची आस्त कायम राखली. क्लेयटन सिल्वान दोनूय गोल केले.
विवेकानंद युवा भारती क्रिडांगण मैदानाचेर जाल्ली मॅच सामकी उमळशीक वाडोवपी थारली. पयल्या अर्दांत मेळिल्ले पॅनल्टीच्या नेटार 38व्या मिनटाक क्लेयटन सिल्वान इस्ट बंगालाचें खातें उगडलें.
एका गोलान फाटीं पडिल्ल्या बंगळुरू एफसीन दुसऱ्या अर्दांत आपल्या खेळांत बरीच सुदारणां केली. ताचो फायदो ताका रोखडोच जालो. झेवियर हर्नांडीसान गोल करून बंगळुरूक 1-1 असो बरोबरींत हाडलो. मॅच आतां बरोबरींत उरतली अशें दिसता आसतना इंज्युरी टायमांत सिल्वा परतून एकदा आपल्या पंगडाचे मजतीक धांवन आयलो. ताणें गोल करून इस्ट बंगालाक निसट्टें जैत मेळोवन दिलें. ह्या जैतान फाटल्या दोन मॅची सावन चालू आशिल्लो हारीचो क्रम मोडलो. 11 मॅचींतल्यान चार जैता सयत ताणें आपल्या गुणांची संख्या 10चेर व्हेली. दुसरे वटन बंगळुरूची ही सातवी हार थारली.
ते पयलीं म्हान फुटबॉलर पेलेक आर्गां ओंपून मॅचीक सुरवात केली. ब्राझिलाच्या म्हान फुटबॉलर पेलेक बिरेस्तारा रातीं कडेन मरण आयिल्ले.
मजगतीं, हंगामाचे सुरवातीचे मॅचींत इस्ट बंगालान बंगळुरूक 1-0 असो हारयिल्लो. ताचो बदलो घेवपाचे दिश्टीन बंगळुरू मैदानांत देंविल्लो. पयल्या मिनटा सावन ताणें आक्रमक खेळ केलो. दुसऱ्याच मिनटाक पाब्लो पेरेझ बॉल घेवन पॅनल्टी क्षेत्रांत घुशिल्लो. पूण, इस्ट बंगालाच्या डिफॅण्डरांनी ताका आडायलो.
प्ले ऑफांतली आस्त कायम राखपाक दोनूय पंगडांक जैत गरजेचें आशिल्लें. ताकाच लागून दोनूय पंगडांनी जबरदस्त खेळ केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
